پاکستاني ځواکونو علي وزير تر خوشې کېدو وروسته یوځل بیا نیولی
سرچینو افغانستان انټرنشنل ته وویل، چې د پښتون ژغورنې غورځنګ جګپوړی غړی علي وزیر له زندان څخه تر خوشې کېدو وروسته یوځل بيا نیول شوی دی. علي وزیر د سند ايالت په سکر کې د پښتون ژغورنې غورځنګ د غړي نعيم خان سلیمان خېل له کوره نیول شوی.
نعيم خان افغانستان انټرنشنل ته تايید کړه، چې له روژه ماتي وروسته ګڼ شمېر پوليس او په ساده جامو کې دولتي کسان راغلل او علي وزیر یې له ځان سره یووړ.
ده زیاته کړه: «موږ اوس پسې ګرځو خو د علي وزیر کوم درک نه دی مالوم چې کوم ځای ته یې بېولی دی».
علي وزير د ۲۰۲۴ کال د اګست په مياشت کې په اسلاماباد کې نیول شوی و او وروسته د بلوچستان، پنجاب او سند ایالتونو په بېلابېلو زندانونو کې په مختلفو قضيو کې بندي و.
وزیر د دوشنبې په ورځ، د مارچ پر ۱۶مه، مازيګر د سند له سکر زندان څخه خوشی شوی و.
