ذبیح‌الله مجاهد: له ټولو هېوادونو غواړو چې د پاکستان د جنایتونو مخه ونیسي

هغه له یوې داخلي خصوصي رسنۍ سره په مرکه کې ویلي: «اوس په جګړه کې یو. هغو [پاکستان] وحشت رامنځته کړی. نه‌غواړو پر ډيپلوماسۍ ډېر تمرکز وکړو. هغوی باید نظامي ځواب ته په تمه واوسي».

د نوموړي په باور، پاکستان په قصدي توګه روغتیايي مرکز په نښه کړی، څو وحشت او وېره خپره کړي او همداراز یې خبرداری ورکړ: «موږ به له خپلو خلکو دفاع وکړو او له دوښمن څخه به ډېر سخت غچ واخلو. دا به د پاکستان نظامي رژيم ته ډېره سخته او درنه تمامه شي».

هغه همداراز ویلي: «دا د افغانانو حق دی چې غچ واخلي او جنایتکاران په خپلو ځالو کې وځپي».

شرافت زمان امرخېل زیاتوي، د کابل- جلال‌اباد پر لویه لاره په هودخېلو سیمه کې د معتادینو د درملنې په مرکز کې څه باندې ۳ زره معتادین تر درملنې لاندې وو. د نوموړي په وینا، پاکستاني پوځ چې د یاد روغتیايي مرکز پر کومې ساحې بمبار کړی هلته څه باندې ۲۰۰ معتادین تر درملنې لاندې وو.

هغه وايي، تر اوسه د وژل شویو کسانو کره شمېر معلوم نه‌دی، خو شاوخوا ۱۵۰ کسان نورو روغتونونو ته د درملنې لپاره لېږدول شوي دي.

د هغه په وینا، د ژغورنې عملیات لا هم روان دي.

تادین خان پر کابل او یو شمېر نورو ولایتونو د پاکستان د دوشنبې شپې د بریدونو په غبرګون کې ویلي، چې بهرنیو لاسوهنو هېواد ته داخلي جنګونه راوړي او افغان ملت يې په پردیو جګړو کې ښکېل کړی.

نوموړي زیاته کړې، «له دې سره سره پاکستان دې دا نه‌ هېروي چې افغانان یو لوی ملت دي او حکومتونه هېوادونه نه‌شي ساتلی، دا ملتونه دي چې هېوادونه ساتي».

تادین خان د نړۍوالو له امنیتي او بشري حقونو اړوندو سازمانونو څخه غوښتنه کړې، چې په افغانستان کې د پاکستان د پوځ بریدونو د څېړلو لپاره دېیوه کمېټه جوړه کړي.

هغه همداراز ویلي: «موږ په افغانستان کې د عاجلې، ریښتینې ملي لویې جرګې د جوړېدو غوښتنه کوو، تر څو ملت خپل سرنوشت، اساسي قانون، مشروع حکومتولي، بهرنۍ او داخلي پالیسي او ستراتیژیکې ګټې پخپله پکې تعریف کړي».

همداراز د ننګرهار د خوګیاڼو‌ په وزیرو سیمه کې د طالبانو سرحدي کنډک، په غني خېلو، نازیانو، اچین او ګوشتې ولسوالیو کې یو شمېر سیمې بمبار کړې دي. ځايي سرچینو ویلي، چې خوګیاڼو کې د دغو هوایي بریدونو له کبله دوه تنه طالبان په ټپي حالت کې ځايي روغتون ته وړل شوي دي.

د‌ طالبانو ویاند ذبیح‌الله مجاهد هم دغه بریدونه منلي‌ او ادعا یې کړې، چې پاکستانۍ الوتکو د کابل لسمه ناحیه کې د معتادینو یو روغتون بمبار کړی دی. هغه په دغه روغتون کې د مرګ‌ژوبلې په تړاو نور جزییات نه دي ورکړي.

لا تر اوسه پورې طالبانو د دغو بریدونو ټول جزییات نه دي خپاره کړي او نه هم د پاکستان پوځ او حکومت په رسمي توګه د دغو بریدونو په اړه څه ویلي دي.

علي‌احمد جلالي په دې مرکه کې څرګنده کړه، دمګړی پاکستان د هغو ډلو په راکابو کولو کې بې‌وسه دی چې په خپله یې جوړې کړې دي: «ځکه پاکستان له کلونو راهیسې په خپل هېواد کې له ترهګرو ډلو ملاتړ کړی او دا فضا داسې ده، چې یوه ډله له‌منځه یوسې بله رامنځته کېږي».

جلالي پر افغانستان د پاکستان بریدونه ننداریز ګڼي او په وینا یې د اسلام‌اباد موخه دا ده، چې طالبان دې ته اړ کړي چې په پاکستان کې د هغو ترهګرو ډلو چې په خپله یې جوړ کړي د له‌منځه وړلو لپاره له هغوی سره همکاري وکړي.

هغه وايي: «پر افغانستان د طالبانو بریدونه ځکه ننداریز دي؛ که یو هېواد وغواړي د جګړې له لارې بل هېواد خپل مطیع وګرځوي، نو په دې څو بمباریو او ډرون بریدونو نه‌کېږي، بلکې اساسي عملیاتو ته اړتیا لري.

د جلالي په باور، پاکستان په اوسنیو شرایطو کې د دغه ډول عملیاتو وس نه‌لري او په وینا یې: «پاکستان پر افغانانو بریالی کېدای هم نه‌شي».

هغه زیاتوي: «پاکستان په اوسنیو شرایطو کې د طالبانو له څنډې ته د کې (انزوا) څخه ناوړه استفاده کوي. د طالبان ډيپلوماټيک فعالیتونه هم د منزوي‌والي له امله پیکه دي».

د افغانستان د کورنیو چارو پخوانی دغه وزیر وايي، د پاکستان په دغو روانو بمباریو کې ولسي وګړو ته مرګ‌ژوبله اوړي او دا په خپله «جنګي جرم» ګڼل کېږي.

د علي‌احمد جلالي په باور، جګړې ملتونه ګټي او په وینا یې، که طالبان غواړي د پاکستان او یا هم بل هر هېواد پر وړاندې مقابله وکړي، باید ملت متحد کړي او ورسره هم مهاله داسې شرایط برابر کړي، «چې خلک د بهرنیو یرغلونو پر وړاندې په داوطلبانه ډول مرسته وکړي او اوسنی وضعیت یوازې د طالبانو اړونده نه‌ده، بلکې د ټولو افغانانو ده او باید وغندل شي».

جلالي په دې مرکه کې په ډاګه وویل: «طالبانو ته مهم مساله د خپل نظام پایښت یا ساتنه ده او دا طالبانو پورې اړونده ده چې د خپل نظام د پایښت لپاره څه ډول اصلاحات راولي، څو د خپل نظام پایښت تضمین کړي».

د هغه په باور، د افغانستان طالبان د دې جوګه نه‌دي او اراده هم نه‌لري، چې په پاکستان کې د ترهګرۍ پر وړاندې مبارزه وکړي، ځکه ځينې هغه ډلې له طالبانو سره په یوه سنګر کې جنګېدلي دي او په وینا یې، ټي‌ټي‌پي د طالبانو په منځ کې پلویان او خواخوږي لري.