په کابل کې د پاکستان د هوايي برید له امله د روږدو کسانو د درملنې په یوه مرکز کې د اور لګېدنې په پایله کې ځینې کورنۍ وايي، چې له یوې شپې او ورځې تېرېدو وروسته لا هم د خپلو خپلوانو له برخلیک څخه بېخبره دي.
د کابل یوه اوسېدونکي د سېشنبې په ورځ افغانستان انټرنشنل ته وویل، تره یې په دغه مرکز کې چې په «امید کمپ» مشهور دی بستر و، خو تر اوسه یې په اړه هېڅ معلومات نه لري. هغه وویل: «د ښار ټول روغتونونه مو وپلټل، خو هغه مو نه د ټپیانو په منځ کې وموند او نه هم د شهیدانو». د هغه په وینا، د طالبانو چارواکي د دې خونړۍ پېښې د مړیو او ټپیانو د برخلیک په اړه کورنیو ته دقیق معلومات نه ورکوي.
د طالبانو چارواکو ویلي، چې په دې پېښه کې لږ تر لږه ۴۰۸ ملکیان چې ډېری یې تر درملنې لاندې روږدي کسان وو، وژل شوي دي. په ورته وخت کې بیا پاکستان دا ادعا رد کړې او ویلي یې دي، چې د دې برید هدف په طالبانو پورې تړلي تاسیسات او د دې ډلې پوځي تجهیزات وو.
له دې سره، اته دیرش کلن بریالی امیري هم په دغه مرکز کې و ترڅو خپل ورور پیدا کړي. ورور یې شاوخوا ۲۵ ورځې وړاندې په یاد مرکز کې بستر شوی و. هغه فرانس پریس خبري اژانس ته وویل: «موږ ته سم او کافي معلومات نه راکول کېږي».
طالبانو ویلي، چې د برید پر مهال په دغه مرکز کې شاوخوا درې زره کسان موجود وو. دا برید له روژه ماتي وروسته وشو او د کابل د اوسېدونکو ترمنځ یې سخته وېره خپره کړه. یو شمېر عیني شاهدانو له برید وروسته صحنې «خورا وحشتناکې» بیان کړې دي.
د یوه امبولانس چلوونکي فهیم رویټرز خبري اژانس ته ویلي، چې له برید لږ ځنډ وروسته سیمې ته رسېدلی دی. هغه وویل: «کله چې سیمې ته ورسېدم، ومې لیدل چې هر څه په سوځېدو دي، خلک سوځېدل».
هغه زیاته کړه: «سهار وختي یې بیا راسره اړیکه ونیوله او راته ویې ویل چې بېرته ورشم، ځکه لا هم تر خاورو لاندې جسدونه پاتې دي».
دغه مرکز په ۲۰۱۶ کال کې تاسیس شوی و او د سلګونو ناروغانو د درملنې ترڅنګ یې هغوی ته حرفوي زدهکړې لکه خیاطي او ترکاڼي هم ورکولې، ترڅو له رغېدو وروسته وکولای شي د کار بازار ته ننوځي.
دا په داسې حال کې ده، چې تېره شپه ناوخته پاکستان یو ځل بیا پر کابل او ننګرهار هوایي بریدونه وکړل، چې په یوه برید کې د روږدو د درملنې یو مرکز په نښه شو.
طالبان وایي، په دې برید کې څه باندې څلور سوه کسان وژل شوي دي او شاوخوا ۲۵۰ نور ټپيان دي.
دغه برید په کور دننه او بهر له پراخو غبرګونونو سره مخ شوی دی.
