د پاکستان هوایي شرکت د متحده عرب اماراتو فجیرې سیمې ته الوتنې وځنډولې
د پاکستان ملي هوايي شرکت پي ای اې د خلیجي هېوادونو د امنیتي وضعیت له ارزونې وروسته اعلان کړی چې د راتلونکو ۴۸ساعتونو لپاره به خپلې الوتنې د متحده عربي اماراتوفجیرې ته وځنډوي.
د یاد شرکت وياند عبدالله افغانستان انټرنشنل ته ویلي، چې د پی اې اې الوتکې به تر نوي اعلان پورې یوازې د متحده عربي اماراتو العین ښار ته الوتنې کوي.
د نوموړي په وینا، له پاکستان څخه د پي اې اې عادي الوتنې د دوبۍ، شارجې، ابوظبۍ او العین لور ته تللې، خو د دوبۍ او ابوظبۍ پر هوايي ډګرونو له بریدونو وروسته د شرکت مدیریت پرېکړه وکړه چې د دوبۍ پر ځای فجیرې او د ابوظبۍ پر ځای العین هوايي ډګرونه وکاروي.
هغه زیاته کړه چې د پرونۍ میزایل حملې وروسته د امنیتي خطرونو د زیاتوالي له امله فجیرې ته الوتنې هم ځنډول شوې او دا مهال يوازې العین د پی اې اې له خوا د بدیل هوايي ډګر په توګه کارول کېږي.
