د خبریالانو خوندیتوب کمېټې د رسنیو ملاتړو دوو نورو بنسټونو سره یوځای په یوه پرانیستي لیک کې د پاکستان له لومړي وزیر شهباز شریف غوښتي، چې په دغه هېواد کې دې د جلاوطنه افغان خبریالانو د نیولو، ځورولو او اېستلو لړۍ ودروي.
دغه ګډ لیک کې چې (د کب په ۲۲مه) نوموړي ته لېږل شوی پهکې راغلي، هغه افغان خبریالان چې د طالبانو د ګواښونو له امله جلاوطنه شوي؛ اوس په پاکستان کې د اسلاماباد او طالبانو د کړکېچ له امله په نښه کېږي.
د دغه لیک له مخې؛ افغانستان ته د دغه خبریالانو اېستل دوی د غچ اخیستنې، خپلسرې نیونې او د نورو جدي زیانونو په ګډون له احتمالي ګواښونو سره مخ کړي دي.
په دغه لیک کې له پاکستان نه غوښتل شوي، چې سملاسي دې د افغان خبریالانو د خپلسرو نیونو، ځورونو او جبري اېستلو لړۍ ودروي او د هغه کسانو لپاره دې د ساتنې لنډمهاله چوکاټ رامنځته کړي، چې درېیمو هېوادونو ته د بیا مېشتېدنې په تمه دي.
