د طالبانو ستره محکمه وايي، چې د کوچني اختر په مناسبت د مولوي هبتالله اخوندزاده د حکم پر بنسټ له زندانونو څخه نږدې لس زره بندیان خوشې شوي یا یې د بند په موده کې تخفیف ورکړل شوی دی. په دغه شمېر کې ۴۵۹۶ تنه خوشي شوي او د ۴۴۰۷ تنو د بند سزا کمه شوې ده.
د طالبانو د سترې محکمې د اعلامیې له مخې، دا پرېکړه د هبت الله اخوندزاده د (۴۴۱۴) شمېرې حکم له مخې پلې شوې ده.
اعلامیه وايي، چې دغه بهیر د طالبانو د سترې محکمې د رییس او قاضي القضات عبدالحکیم حقاني په لارښوونه، د یوې ځانګړې کړنلار له مخې پلی شوی دی.
یاده محکمه وايي، چې په ټولیز ډول ۹۰۰۳ تنه مستحق بندیان له زندانونو ازاد شوي یا یې د سزا موده کمه شوې ده.
له دې ډلې ۴۵۹۶ تنه هغه بندیان دي چې بشپړه بښنه ورته شوې او خوشې شوي دي او ۴۴۰۷ تنو نورو بندیانو ته د بند په موده کې تخفیف ورکړل شوی دی.
د طالبانو د چارواکو په وینا، د بندیانو د ارزونې او خوشې کېدو لپاره یو ځانګړی پلاوی ټاکل شوی و چې مشري یې د دې ډلې د سترې محکمې د قضایي تفتیش عمومي رییس کوله.
د کندهار له بېلابېلو بازارونو څخه سرچینو افغانستان انټرنشنل - پښتو ته د اختر د چمتووالي انځورونه لېږلي. سرچینو د ناامنۍ وېرې، د عامو خلکو د ګڼې ګوڼې او د کندهار په بازارونو کې د توکو په پېرلو کې د خلکو پراخې بېوزلۍ او کمزوري اقتصادي وضعیت ته اشارې کړې ده.
شېرمحمد چې د کندهار په هرات بازار کې وچه مېوه پلوري وايي، بازارونه تر پخوا ساړه دي او خلک یوازې د اړتیا وړ توکي پېري: «سودا نه کېږي او خلک یوازې ګرځي، نرخونه ګوري، لږه سودا کوي او اکثره بېرته تش لاسونه ستنېږي».
د خلکو په وینا؛ بېوزلي، د عوایدو کمښت او د کار نشتوالی هغه څه دي چې د اختر پر چمتووالي یې سیوری غوړولی دی. د بوټونو یو سوداګر چې نه غواړي نوم یې واخیستل شي وايي، د وروستۍ ناامنۍ وېرې هم د خلکو پر ورځني ژوند اغېز کړی او دغه وضعیت د سوداګرۍ پر بهیر منفي اغېز لري.
ناوړه اقتصادي وضعیت، امنیتي اندېښنې او په بېسارې توګه د کډوالۍ دوام هغه ستونزې او اندېښنې دي، چې افغانان ورسره لاس او ګرېوان دي. له دغه ټولو ناخوالو سره - سره بیا هم د اختر نمانځل افغانانو ته تر نورو ټولو مراسمو خورا مهم وي او په پراخه توګه یې نمانځي.
کندهار ښار په انځورونو کې
کندهار هرات بازار خلک د اختر تیاریو لپاره راوتلي
دا د کندهار شهیدانو چوک ته څېرمه د سړک پر غاړه د څپلیو پلورونکی دی. ډېر هغه خلک دلته سودا کوي چې اقتصادي وضعیت یې ښه نه وي؛ ځکه د دې بیې تر مغازو مناسبې وي.
دا د کندهار په هرات بازار کې د وچې مېوې پلورونځي دي، په دې شپو او ورځو کې ډېری خلک د سړکونو پر سر هم وچه مېوه پلوري.
په کندهار کې د طالبانو د امنیې قوماندانۍ د معلوماتو له مخې؛ د اختر د شپو او ورځو د امنیت خوندي ساتلو لپاره یې ۱۰۰۰ کسیزه ځانګړې قطعه په ښار کې ځای پر ځای کړې. او دا هم د یادې قطعې یوه برخه ده.
چهارسوو د سړکونو پر سر د وچې مېوې او جامو د پلور کراچۍ او هټۍ
د بېوزلی نښې: سپين ږېری د سړک پر سر د کورونو زاړه توکي او د ماشومانو استعمال شوي کالي پلوري.
تنکی ځوان په چهارسو کې له یوې رېړۍ څخه ځان ته د اختر لپاره خولۍ خوښوي.
د کندهار په شاه بازار کې د سړک پر سر د وچې مېوې پلورونکي او پېرېدونکي.
د شهیدانو پر چوک یو شمېر خلک ښکاري، چې تر سودا پېرلو وروسته کورونو ته روان دي.
د بېوزلۍ نښې: د ښار په یوه څنډه کې یو شمېر خلک د اختر لپاره په تیاریو بوخت دي؛ خو په څو مترۍ کې یې بیا ډېری کسان کړۍ ورځ د کار په لټه د سړک پر غاړه تېروي.
کندهار شهیدان څلور لارې