د ملګرو ملتونو د خوړو نړۍوال پروګرام اعلان کړی، چې په منځني ختیځ کې د روانې جګړې دوام او د سوداګرۍ او اقتصاد ګډوډېدل ښايي په نړۍ کې ۴۵ میلیونه نور کسان هم له سختې لوږې سره مخ کړي.
د دغه بنسټ په وینا، د افریقا د لويې دښتې سوېلي هېوادونه او اسیايي هېوادونه تر هر چا زیات زیانمنونکي دي.
دغه بنسټ د خپلو تحلیلونو د پایلو پر بنسټ ویلي: «که دا نښتې د کال تر نیمايي پورې پای ته ونه رسېږي او د تېلو بیه د هر بېلر په بدل کې له ۱۰۰ ډالرو پورته پاتې شي، ښايي نږدې ۴۵ میلیونه نور کسان له سختې خوراکي ناامنۍ یا تر هغه له بدتر حالت سره مخ شي».
د خوړو د نړۍوال پروګرام مرستیال او عملیاتي مدیر کارل اېسکو په یوه بیانیه کې ویلي: «که دا شخړه دوام وکړي، په ټوله نړۍ کې به د شاک یوه څپه رامنځته کړي او هغه کورنۍ به تر ټولو زیات زیانمنې شي چې همدا اوس هم د خپل د یوه وخت ډوډۍ د پوره کولو وس نه لري».
