اسراییلي پوځ د لبنان په سوېل کې د «بریدونو نوې څپې» د پیل خبر ورکړ
صور ښار او په سیمه کې د فلسطیني کډوالو پنډغالو اوسېدونکو ته تر خبرداري څو ساعته وروسته اسراییلي پوځ اعلان وکړ، چې دوی په سویلي لبنان کې «د بریدونو نوې څپه» پیل کړې ده.
اسراییل ادعا کړې، چې دغه اقدام د حزب الله لهخوا «د اسراییل په خاوره د توغندیز برید» په ځواب کې شوی دی. ورته مهال رویټرز خبري اژانس د یوه عیني شاهد په حواله لیکلي، چې د چهارشنبې په سهار (د کب ۲۷مه) د بیروت بچورا سیمه په هوايي بریدونو کې په نښه شوه او په سیمه کې د یوې زورورې چاودنې غږ هم اورېدل شوی.
دغه برید وروسته له هغه شوی، چې د اسراییل پوځ د بیروت په مرکزي سیمه کې د یوې ودانۍ د خالي کولو غوښتنه وکړه.
