د امنیتي حل په توګه؛ زېلېنسکي د هرمز تنګي لپاره د لارښود شويو اوبتلونو د پراختیا خبر ورکړ
د اوکراین ولسمشر ولادیمیر زېلېنسکي په منځني ختیځ کې د دغه هېواد تر ۲۰۰ څخه زیاتو متخصصینو د حضور او په راتلونکو ورځو کې سیمې ته د ۳۴نورو د لېږد یادونه کړې او ویلي یې دي، چې دغه کسان له متحده عربي اماراتو، سعودي عربستان، قطر او کوېټ سره د بېپیلوټه الوتکو په نسکورولو کې مرسته کوي.
هغه د برېتانیا په پارلمان کې ټینګار کړی، چې منځني ختیځ ته د اوکرایني متخصصینو لېږد اوس د متحده ایالاتو او د ایران شاوخوا هېوادونو په غوښتنه ترسره کېږي. زېلېنسکي زیاته کړه: «دا د ډرون تړون یوه برخه ده، چې موږ متحده ایالاتو ته وړاندیز کړې وه او دا لاهم د مېز په سر ده».
هغه د اوکراین د سمندري ډرون سیسټمونو دوامداره پرمختګ ته په اشارې سره وویل:« موږ په سمندر کې په دې پرمختګ تمرکز کولو سره بریالي شو؛ موږ له ساده ډرونونو سره پیل وکړ، بیا مو داسې ډرونونه جوړ کړل چې برجونه لري او چورلکې نسکورولای شي. اوس موږ داسې ډرونونه لرو، چې کولای شي له سمندر څخه روسي جېټ الوتکې نسکورې کړي».
هغه د هغو کښتیو پراختیا ته اشاره وکړه، چې ډرونونه لېږدوي: «موږ داسې کښتۍ رامنځته کړې، چې ډرونونه لېږدوي او دارنګه هغه کښتۍ چې له سمندر څخه ځمکنۍ موخې په نښه کوي». زېلېنسکي زیاته کړه: «سربېره پر دې موږ په اغېزمنو اوبتل سیسټمونو کار کوو او په تور سمندر کې د ګواښونو سره د مقابلې لپاره مو مناسب امنیتي حل لارې موندلې دي».
