ملګري ملتونه وايي د درملنې مرکزونه باید له پوځي اهدافو جلا وساتل شي
د ملګرو ملتونو د نشهيي توکو پر ضد د مبارزې دفتر استازي پوللیک اوک سري افغانستان انټرنشنل ته ویلي، چې د درملنې مرکزونه باید له پوځي اهدافو جلا وساتل شي. د اوک سري په وینا، د پاکستان هوایي برید کې په نښه شوی مرکز د طالبانو کورنیو چارو وزارت کنټرولاوه.
د نوموړي په وینا، د ملګرو ملتونو د نشهيي توکو پر ضد مبارزې دفتر باور لري چې د روږدو کسانو د درملنې مرکزونه باید د عامې روغتیا وزارت له خوا اداره شي او د درملنې بهیر باید په خپله خوښه، پرته له زور او فشار څخه ترسره شي.
د نوموړي په وینا، دغه مرکز د ملګرو ملتونو تر ملاتړ لاندې نه و.
د راپورونو له مخې، د دوشنبې په شپه پاکستان یو ځل بیا پر کابل او ننګرهار بریدونه وکړل، چې لږ تر لږه درې بمونه د کابل په ختیځ کې د «امېد» په نامه د روږدو کسانو د درملنې پر مرکز ولګېدل. طالبانو ویلي چې په دې پېښه کې ۴۰۰کسان وژل شوي او ۲۵۰نور ټپیان دي. یوې ډیپلوماټیکې سرچینې هم تایید کړې چې د مرګژوبلې شمېر ښايي سلګونو ته ورسېږي.
د ملګرو ملتونو استازي ټینګار کړی چې د نړیوال بشردوستانه قانون له مخې، درملنیز مرکزونه باید له پوځي اهدافو جلا وساتل شي. همداراز، د شخړې ښکېلې خواوې باید پر ملکي اهدافو، په ځانګړې توګه پر روغتونونو او درملنې مرکزونو، له بریدونو ډډه وکړي.
