ایران ته د سعودي عربستان خبرداری: د پوځي اقدام حق ځان ته محفوظ ګڼو
«د سعودي عربستان د بهرنیو چارو وزیر فیصل بن فرحان اعلان وکړ، چې د ایران له لوري فشار به له سیاسي او اخلاقي پلوه برعکس پایله ولري. نوموړي ټینګار وکړ، چې ریاض «د اړتیا په صورت کې د پوځي اقداماتو حق ځان ته محفوظ ساتي».
د سعودي عربستان د بهرنیو چارو وزیر ویلي، چې د ریاض په سیمه کې پر دوو د تېلو تصفیهخونو برید شوی دی او زیاته کړې یې ده، چې د دغه هېواد مشرتابه به په مناسب وخت کې لازمې پرېکړې وکړي.
هغه اشاره وکړه، چې د ایران د اسلامي جمهوریت د بریدونو ځواب کولای شي هم سیاسي او هم غېرسیاسي وي او زیاته یې کړه: «د ایران ټینګار د ښه ګاونډیتوب د اصولو پر نقض د دې لامل شوی چې پر هغه باور کمزوری شي».
بن فرحان د دې په اعلانولو سره چې د ایران اسلامي جمهوریت خپل بریدونه له مخکې پلان کړي وو، زیاته کړه: «دا بریدونه به د ایران انزوا نوره هم زیاته کړي».
هغه د فارس خلیج عربي هېوادونو پر وړاندې د ایران بریدونه وغندل او ټینګار یې وکړ: «د سمندري تګراتګ په ازادۍ کې لاسوهنه د نړۍوال امنیت او سولې لپاره ګواښ دی».
بن فرحان د دې لپاره چې د ایران اسلامي جمهوریت «د نړۍوالې ټولنې پیغام نه دی درک کړی او نه غواړي چې هغه درک کړي» تر نیوکې لاندې راوست او ویې ویل: «ایران باید سمدستي په سیمه کې د نیابتي ډلو ملاتړ بند کړي او د سمندري تګراتګ خوندیتوب تضمین کړي».
هغه ټینګار وکړ، چې تهران باید په خپلو «ناسمو محاسبو» بیاکتنه وکړي، ځکه چې د هغه بریدونه به هېڅ لاسته راوړنه ونه لري.
