د امریکا د جګړې وزیر پیټ هېګسېت د دغه هېواد د ګډو ځواکونو له لوی درستیز جنرال ډان کېن سره یوځای په یوه خبري ناسته کې وویل، چې د ایران اسلامي جمهوریت له امریکا سره۴۷ کاله جګړه کړې ده او دا حالت په افغانستان کې هم و.
هېګسېت ددې پوښتنې په اړه، چې ایران په افغانستان کې د طالبانو په ملاتړ کې څه رول درلود، وویل، چې تهران له ټولو شیعه او سني ډلو تر هغه مهاله ملاتړ کړی، چې د امریکا پرضد جګړه کوي.
هغه زیاته کړه، «د ایران اسلامي جمهوریت له امریکا سره۴۷ کاله جګړه کړې ده او دا حالت په افغانستان کې هم و».
هیګسیټ وویل، چې د اسلامي جمهوریت لپاره د «دښمن د دښمن» تګلاره مهمه وه او له همدې له امله یې په اسلامي نړۍ کې د وسله والو مالي او نور ملاتړ کړی او په ایران، عراق، افغانستان او د نړۍ نورو سیمو کې یې تل امریکایان هدف ګرځولي دي.
د امریکا د جګړې وزیر په خپلو خبرو کې د ایران اسلامي جمهوریت پر وړاندې د ټرمپ د ستراتیژۍ په اړه وویل چې نه غواړي تهران اټومي وړتیا درلودو ته نږدې شي.
هیګسټ زیاته کړه، « په دې حالت کې، هغه څه چې دوی غوښتل او ولسمشر ټرمپ یې نه زغمي، دا دي چې داسې یو رژیم لا زیات اټومي وړتیا ته نږدې شي. هغه وړتیا چې دوی ویلي غواړي ویې کاروي او موږ باید دا خبره جدي ونیسو، ځکه دا د نړۍ تر ټولو خطرناکه وسله ده».
نوموړي وویل، چې د ایران اسلامي جمهوریت په هر ډګر کې د امریکا لپاره ګواښ پاتې شوی او کله ناکله اړتیا وي چې خلکو ته دا یادونه وشي.
هغه زیاته کړه، « خو اوس موږ یو داسې اعلی سر قوماندان لرو چې دا موضوع یې په جدي ډول درک کړې او ویلي یې دي چې موږ به یې پر وړاندې ګامونه واخلو».
د امریکا د جنګ وزیر وویل، چې د ایران «مرګ پر امریکا، مرګ پر اسراییل» شعار د ولسمشر ټرمپ یاد دی او دوی هڅه کړې چې دا پلی کړي.
