انس حقاني چې د حقاني شبکې له لوړپوړو غړو څخه شمېرل کېږي، پر افغانستان د پاکستان وروستیو بریدونو ته په اشارې ویلي، چې افغانان به له دغو ناخوالو او تېري څخه سرلوړي راووځي.
انس حقاني په خپله اېکسپاڼه کې په خپل اختریز پیغام کې د وروستیو بریدونو د قربانیانو له کورنیو سره خواخوږي څرګنده کړې او ویلي یې دي: «موږ افغانانو د ډېرو سختیو پر وړاندې مقاومت کړی دی او موږ داسې ملت او هېواد نه یو چې د پېښو زیږنده واوسو. له دغو ناخوالو او تېري څخه به هم انشاءالله سرلوړي راووځو».نوموړی پرته له دې چې د کوم لوري یا هېواد نوم واخلي، همداراز وایي چې دمګړی نړۍ د ناسمو سیاستونو او ځانغوښتنې په لمبو کې سوځي او هغه همداراز وایي، چې د دوی پام له هغو خلکو سره دی، چې له خپلو ماشومانو سره یوځای شپې او ورځې په لوګیو، بارودو او د چاودنو په غږونو کې تېروي.نوموړی دغه څرګندونې په داسې حال کې کوي، چې له تېرو شاوخوا شلو ورځو راهیسې د طالبانو او پاکستاني ځواکونو ترمنځ سختې نښتې روانې دي. پاکستان په وار وار په یو شمېر ولایتونو کې هوايي بریدونه کړي، چې له امله یې ګڼو ملکي کسانو ته مرګژوبله اوښتې ده.پاکستان په خپل وروستي اقدام کې په کابل کې د روږدو کسانو د درملنې پر یوه مرکز برید کړی، چې د طالبانو د چارواکو په وینا په پایله کې یې څه باندې ۴۰۰ کسان وژل شوي دي.د راپورونو پربنسټ، د پاکستان هوايي بریدونو لږ تر لږه د کابل په ګډون ۱۰ ولایتونه اغېزمن کړي دي.
هغه وویل چې د دوشنبې په ورځ یې ولیدل چې یوه الوتکه بم غورځوي. کله چې بېرته مرکز ته ورغی، هر څه ویجاړ شوي وو. د هغه په وینا: «له هر لوري چیغې وې، ټپیان او مړي هر ځای پراته وو... موږ له کنډوالو څلور کسان ژوندي را وایستل، خو نور ټول مړه شوي وو او جسدونه د پېژندلو نه وو.»
د طالبانو حکومت ویلي چې په دې برید کې له ۴۰۰ زیات کسان وژل شوي او ۲۶۵ نور ټپیان دي.
پاکستان دا ادعا ردوي چې د بیا رغونې مرکز یې په نښه کړی، خو خپلواکو سرچینو او شاهدانو تایید کړې چې مرکز په نښه شوی دی.
نظر محمد رویټرز ته وویل، چې که له دې مرکز څخه ووځي، ښايي بېرته نشې ته مخه کړي. هغه وویل: «موږ دلته مبارزه وکړه او ژوندی پاتې شوو، خو اوس نه پوهېږم چې بیا به څنګه ځان وژغورو.»
کارپوهان وایي چې په افغانستان کې د روږدو ستونزه پراخه ده. د اټکل له مخې، د شاوخوا ۴۰ میلیونه نفوس له ډلې نږدې ۱۵ سلنه خلک له نشې سره مخ دي. بېوزلي، بېکاري او ټولنیزې ستونزې د دې وضعیت مهم عوامل بلل کېږي.
سره له دې چې طالبانو په ۲۰۲۲ کال کې د نشهيي بوټو کرکيله بنده کړه او د کوکنارو کښت ډېر کم شوی، خو د ملګرو ملتونو په وینا، خلک اوس مصنوعي نشهيي موادو او درملو ته مخه کوي.
کارپوهان خبرداری ورکوي چې د داسې یو مرکز له منځه تګ یوازې د ناروغانو درملنه نه ځنډوي، بلکې په ټول هېواد کې د درملنې پر محدودو امکاناتو هم درنه ضربه ده.
احمد بلال تیموري، چې د کټامین له نشې د خلاصون لپاره یوازې ۲۰ ورځې مخکې مرکز ته تللی و، وایي چې د درملنې بهیر یې ښه روان و، خو اوس هر څه له منځه تللي دي.
هغه وویل: «پلار مې دلته راوستلم، په لومړیو کې نه وم راضي، خو وروسته چې ښه کېدلم، خپله مې غوښتل چې جوړ شم.»