د افغانستان د وزلویې ملي لوبډلې روسیې ته په ماتې ورکولو سره په قزاقستان کې د ۲۰۲۶کال د وزلوبې نړۍوالو سیالیو بل پړاو ته لاره وموندله. د دغه سیالیو پر دوام، د افغانستان د وزلوبې ملي لوبډلې په خپله دویمه لوبه کې د روسیې لوبډلې ته ۵-۰ په توپیر ماتې ورکړه.
دا په دغه سیالیو کې د افغان لوبغاړو دویمه پرلهپسې بریا ده. د افغانستان د وزلوبې ملي لوبډلې تر دې مخکې په خپله لومړۍ لوبه کې د هنګري لوبډلې ته د ۱۴-۰ په توپیر ماتې ورکړې وه.
افغان لوبډله به نن د افغانستان په وخت د غرمې په ۱۲:۳۰ بجو په خپله درېیمه لوبه کې د منګولیا په وړاندې ولوبېږي. افغانستان د دغه سیالیو په دویم ګروپ کې له روسیې، هنګري او منګولیا سره همډلی دی.
په دغه سیالیو کې ۹ لوبډلو ګډون کړی، چې په دوو ګروپونو وېشل شوي دي؛ لومړی ګروپ پنځه لوبډلې لري او دویم ګروپ بیا څلور لوبډلې لري. د دغه سیالیو په لومړي ګروپ کې د ترکیې، قزاقستان، چین، تاجکستان او ازبکستان لوبډلې شاملې دي.
دغه سیالۍ سېشنبه (د کب ۲۶مه) پیل شوې، چې د وري میاشتې تر لومړۍ نېټې به دوام وکړي. دغه سیالۍ د قزاقستان په کوربهتوب په ترکستان ښار کې ترسره کېږي.
