د افغانستان د تکواندو پخوانی اتل حبیب جان عرب ومړ
د افغانستان د تکواندو فدراسیون اعلان کړی، حبیب جان عرب چې د تکواندو پخوانی ملي اتل و؛ وفات شوی دی. که څه هم د تکواندو فدراسیون د دغه لوبغاړي د مړینې لامل په اړه جزییات نهدي ورکړي؛ خو رسنیو راپور ورکړی چې هغه پرون په تخار ولایت کې د ورپېښې ناروغۍ له امله مړ شوی.
د تکواندو فدراسیون په یوه خبرپاڼه کې حبیب جان عرب د افغانستان د تکواندو ملي لوبډلې یو ژمن او ویاړلی لوبغاړی وباله او د هغه مړینه یې د سپورت کورنۍ او د افغانستان د تکواندو ټولنې لپاره یوه لویه ضایعه وبلله.
حبیب جان عرب د یو کال څخه د ډېر وخت لپاره د افغانستان د تکواندو ملي لوبډلې غړی و او په دې موده کې هغه وکړای شو، چې د خپل غوره فعالیت سره د خلکو پام ځانته راواړوي.
