شریف ته د سهیل اپریدي لیک؛ عمرانخان او مېرمنې ته دې له کورنۍ سره د ملاقات اجازه ورکړل شي
د خیبر پښتونخوا سر وزیر سهیل اپریدي د پاکستان لومړي وزیر شهباز شریف ته یو لیک استولی. سهیل اپریدي په دغه لیک کې د پاکستان تحریک انصاف ګوند بنسټ اېښودونکي عمران خان او د هغه مېرمنې بشرا بيبي ته د اختر په ورځ له خپلې کورنۍ سره د ملاقات اجازې ورکولو غوښتنه کړې ده.
د خیبر پښتونخوا سر وزیر سهیل اپریدي شهباز شریف ته په دغه لیک کې ویلي، چې د تحریک انصاف ګوند له بنسټ اېښودونکي او بشرا بيبي سره د ملاقات مسله مخکې هم څو ځلې راپورته شوې او له خپلو کورنیو سره د بندیانو د ملاقات حق باید د قانوني او بشري اساساتو له مخې ډاډمن شي.
نوموړي په دغه لیک کې کاږلي، چې د زندان د لارښود او د محکمې د حکمونو سره، سره د بنسټیزو حقونو په ټینګښت کې دغه ډول خنډ د اندېښنې وړ دی. هغه ویلي، دا د دولت قانوني مسوولیت دی چې بندیانو ته له کورنیو سره د ملاقات او د روغتیایي اسانتیاوو زمینه برابره کړي.
په لیک کې زیاته شوې، چې د تحریک انصاف ګوند بنسټ اېښودونکي او د هغه مېرمنې ته باید د قانون په رڼا کې ټول حقونه ورکړل شي.
