رانا ثناالله: موږ د افغانستان د هیڅ برخې د نیولو نیت نه لرو
د پاکستان د لومړي وزیر سلاکار رانا ثناالله ویلي، چې هیواد یې نه د جګړې د تحمیلولو هڅه کوي او نه هم د افغانستان د کومې برخې د نیولو اراده لري. هغه زیاته کړې، چې د اسلام اباد یوازینۍ غوښتنه دا وه چې د افغانستان خاوره باید د پاکستان پر وړاندې ونه کارول شي.
په افغانستان کې د طالبانو سره د جګړې په اړه، هغه ټینګار وکړ چې عملیات د وسله والو د پټنځایونو او خوندي ځایونو د له منځه وړلو په موخه وو.
رانا ثناالله خبرداری ورکړ، چې د داسې اډو بیا راڅرګندېدل به له نږدې وڅارل شي او ځواب به ورکړل شي.
په ورته وخت کې د پاکستان د پوځ مشر عاصم منیر د کرم سیمې ته د سفر او په کوچني اختر کې د خپلو سرتیرو سره د لیدنې پر مهال ټینګار وکړ، چې د افغانستان خاوره باید د پاکستان پر وړاندې ونه کارول شي.
منیر ویلي، چې په افغانستان کې عملیات د ترهګرو شبکو د له منځه وړلو او په سرحدي سیمو کې د تلپاتې سولې د ډاډمنولو په موخه ترسره شوي دي.
بل خوا طالبانو د پاکستان دا تورونه چې ګواکې دغه ډلې د افغانستان په خاوره کې ټي ټي پي ته پټنځایونه او ملاتړ برابر کړی، تل رد کړي او ویلي یې دي چې دوی به اجازه ورنکړي چې د افغانستان خاوره د نورو هیوادونو پر وړاندې وکارول شي.
