د جي۷ هېوادونه: د انرژۍ د نړۍوال تامین او د هرمز تنګي د خوندیتوب لپاره اقدام ته چمتو یو
د جي۷ ډلې د بهرنیو چارو وزیرانو اعلان وکړ، چې دوی چمتو دي څو د نړۍوالې انرژۍ د تامین د ملاتړ لپاره اړین ګامونه واخلي او یو ځل بیا یې د سمندري لارو په ځانګړي ډول د هرمز تنګي د ساتنې پر اهمیت ټینګار وکړ.
د امریکا، برېتانیا، فرانسې، جرمني، ایټالیا، کاناډا او جاپان د بهرنیو چارو وزیرانو د اروپايي ټولنې له لوړپوړي ډیپلوماټ سره یوځای د شنبې په ورځ (د وري په لومړۍ نېټه) په یوه ګډه اعلامیه کې لیکلي: «موږ په سیمه کې له خپلو شریکانو څخه د ایران او د هغه د نیابتي ځواکونو د ناحقه بریدونو پر وړاندې خپل ملاتړ څرګندوو».
د دې اعلامیې په دوام کې راغلي: «موږ د دې رژیم لهخوا پر ملکي وګړو او ملکي زېربناوو په ځانګړي ډول د انرژۍ پر تاسیساتو بېپروا او ناسنجول شوي بریدونه په سختو ټکو غندو».
د جي۷ ډلې همداراز د اسلامي جمهوریت او د هغه د نیابتي ډلو لهخوا په ځانګړي ډول د انرژۍ پر زېربناوو د ټولو بریدونو د «سمدستي او بېقید او شرط» درولو غوښتنه وکړه.
دا په داسې حال کې ده، چې تر دې وړاندې جرمني، برېتانیا، فرانسې، ایټالیا، هالنډ او جاپان د پنجشنبې په ورځ (د کب ۲۸مه) په یوه ګډه اعلامیه کې د اسلامي جمهوریت لهخوا د هرمز تنګي تړل کېدل په کلکه وغندل.
د دې ګډې اعلامیې له خپرېدو وروسته ۱۶ نورو هېوادونو هم په لاسلیک کولو سره اعلان وکړ، چې د انرژۍ د بازارونو د ثبات لپاره به اقدام وکړي او د فارس خلیج د نفتو مهمې لارې یعنې د هرمز تنګي د بېرته پرانیستلو لپاره به له «مناسبو هڅو» سره یوځای شي.
