د طالبانو د ټرانسپورټ او هوايي چلند وزارت وايي، په تېر ۱۴۰۴ هجري- لمریز کال کې د هېواد له هوايي ډګرونو څه باندې ۱۲ زره الوتنې شوې دي. د دغه وزارت ویاند وايي، په همدې موده کې شاوخوا ۱ اعشاریه ۶ میلیونه مسافر هم لېږدول شوي دي.
د طالبانو د ټرانسپورټ او هوايي چلند وزارت ویاند حکمتالله اصفي د دغې ډلې تر کنټرول لاندې ملي ټلوېزیون ته ویلي، په تېر کال کې د هوايي چلند برخې او په ځانګړې توګه د پرسونل د ظرفیت لوړونې ته ډېر پام شوی دی.
حکمتالله اصفي وایي: «له ټولو هوايي ډګرونو څخه څه باندې ۱۲ زره الوتنې شوې دي، چې موږ ویلی شو ۱ اعشاریه ۶ میلیونه مسافر انتقال شوي دي».
د هغه په وینا، د کارګو او د الوتکو د چک او تخنیک په برخو کې هم خدمات ښه شوي او زیاتوي: «د کارګو یا هوايي مسیرونو له لارې د بارونو لېږد لپاره خدمات رامنځته شوي دي. د دې ترڅنګ د الوتکو د چک او تخنیک په برخو کې زموږ د کارکوونکو له لوري پر وخت خدمات وړاندې کېږي».
د دغه وزارت په وینا، په تېر ۱۴۰۴ کال کې د سیستمونو د برېښنايي کېدو په برخو کې هم کار شوی او ډېری برخې پر پرمختللو ټېکنالوژیو سمبال شوي دي.
د یاد وزارت ویاند وايي: «په ۱۴۰۴ کال کې موږ د املاکو د ثبت، د عوایدو د مدیریت سیستم، د ځمکني ټرانسپورټ په برخو کې بېلابېل سیستمونه، د بار او مسافرو د انتقال او د هغوی د احصایې د ثبت سیستمونه، د هوايي چلند د احصایې او عوایدو د ثبت سیستم فعال شوي دي».
په لومړي ځل اتحاد نړیوال هوایي شرکت افغانستان ته خپلې الوتنې پیل کړې | افغانستان انټرنشنل پښتو
هغه په دې تړاو چې دمګړۍ د څومره هوايي شرکتونو الوتکې افغانستان ته تګ راتګ کوي، څه ونهویل، خو همدا پرون په لومړي ځل د «اتحاد» په نوم یوه نړیوال هوايي شرکت افغانستان ته خپلې الوتنې پیل کړې او لومړنۍ الوتنه یې هم د جمعې په ورځ د کب پر۲۹مه تر سره شوه او دا شرکت به افغاتنستان ته هره اونۍ ۴الوتنې ولري.
د یادونې وړ ده، چې په منځني ختیځ کې د روان کړکېچ له امله د افغانستان په هوايي حریم کې د نړۍوالو الوتنو په کچه کې د پام وړ ډېرښت راغلی دی.
