په ملګرو ملتونو کې د افغانستان د دایمي استازولۍ سرپرست، نصیراحمد فایق، ویلي چې سږکال نوروز په داسې وخت کې رارسېږي چې لا هم د نجونو پر مخ ښوونځي تړلي دي او افغانان له سختو او ستونزمنو حالاتو سره مخ دي.
ښاغلي فایق پر ایکس خواله رسنۍ کې لیکلي چې دا پنځم کال دی چې په افغانستان کې د نجونو پر مخ د ښوونځیو او پوهنتونونو دروازې تړلې پاتې دي.
هغه زیاته کړې، چې په دې موده کې ښځې له کار کولو محرومې شوې دي، له ۲۳میلیونو ډېر خلک بشري مرستو ته اړتیا لري او بېوزلي، بېکاري، د راتلونکي په اړه ناهیلي او ناامني ورځ تر بلې زیاتېږي.
نوموړي همداراز ویلي: «په دې لړ کې داسې کورنۍ هم شته چې د پاکستان له لوري د وروستیو بریدونو له امله لا هم د خپلو شهیدانو او ټپیانو په ویر کې دي.»
