زېلېنسکي: د روسیې د بریدونو دوام د نړۍوالو بندیزونو د کمزوري تطبیق پایله ده
د اوکراین ولسمشر ولادیمیر زېلېنسکي ویلي، چې په تېره یوه اونۍ کې روسیې شاوخوا ۱۵۵۰ بریدګرې بېپیلوټه الوتکې، ۱۲۶۰ لارښود شوي بمونه او دوه توغندي پر اوکراین توغولي او په ورته وخت کې یې د بندیزونو کمېدو له امله د جګړې مالي سرچینې د خامو تېلو د پلور له لارې لاپسې پیاوړې کړې دي.
زېلېنسکي ټینګار کړی، د روسیې د اقتصادي فشارونو دوام اړین دی او هغه ټانکرونه چې د جګړې بودجه جوړوي؛ باید د اروپايي او نورو اوبو له لارې بند او مخنیوی یې وشي.
ولادیمیر زېلېنسکي پر اېکس پاڼه څرګنده کړې، چې د روسیې د بریدونو دوام د دغه هېواد د مالي سرچینو د خونديتوب او د بندیزونو د اغېزمنتیا د کمښت پایله ده.
زېلېنسکي د روسیې د سیوري بېړۍ یادونه کړې، چې په اروپايي اوبو کې هم ځان خوندي احساس نهکړي. هغه ټینګار وکړ، هغه ټانکرونه چې د روسیې د جګړې مالي بودجه برابروي؛ باید ودرول شي او اجازه ورنه کړل شي چې په ازاده توګه تګراتګ وکړي.
د اوکراین ولسمشر په دغه یادښت کې له هغو مشرانو مننه کړې، چې د جګړې د مالي تمویل مخنیوي لپاره پرېکړې کوي.
