پاکستاني چارواکي: سبا د تورخم له لارې د افغان کډوالو د اېستلو لړۍ بیا پیلېږي
د افغانستان انټرنشنل ـ پښتو خبریال
په تورخم کې ځینو حکومتي سرچینو افغانستان انټرنشنل – پښتو ته ویلي، چې سبا پنجشنبه د سهار په ۹:۳۰ بجو دغه لاره د افغان کډوالو د اېستلو پر مخ پرانیستل کېږي. سرچینو زیاته کړې، چې په دې تړاو په تورخم کې د پاکستان د فدرالي پلټنو ادارې ته هم لازمې لارښوونې شوې دي.
همداراز ویل شوي، چې د فدرالي پلټنو ادارې (FIA) او د تذکرو او پاسپورټونو ثبتولو ادارې (نادرا) په ګډون ټولو اړوندو ارګانونو ته لارښوونه شوې، چې د کډوالو د اېستلو لپاره خپل سیسټمونه فعال وساتي. د دې ترڅنګ د کډوالو لېږدونکو لاریو ته هم ویل شوي، چې خپل وار (نوبت) ته انتظار وکړي او له وړاندې په ټاکلو قطارونو کې ځای پر ځای شي.
سرچینې وایي، د کډوالو د اېستل کېدو دې بهیر لپاره په تورخم کې کلک امنیتي تدابیر نیول شوي او د پاچا مېنې په ګډون میچنۍ سیمه کې ګرځبندیز هم اعلان شوی دی. دا په داسې حال کې ده، چې د پاکستان او طالبانو ترمنځ د پرلهپسې نښتو له کبله پر ډیورنډ کرښه له پاکستان څخه د کډوالو د اېستل کېدو بهیر هم ټکنی شوی دی.
پاکستان په بېلابېلو ایالتونو کې د افغان کډوالو پر ضد خپل عملیات پراخ کړي او هره ورځ افغانانو پسې کوڅه په کوڅه پولیس ګرځی، زنداني کوي یې او بیا تر څه مودې وروسته پر ډیورنډ کرښه یې افغانستان ته ستنوي، خو له تېرې اکټوبر میاشتې راهیسې د جګړو له امله د اېستل کېدو دا بهیر ټکنی شوی و، چې له کبله یې ډېر کله افغانان د اېستل کېدو پر ځای د پاکستان زندانونو کې پاتې کېدل.
