مصری ډیپلوماټ نبیل فهمي د عرب هېوادونو د ټولنې د راتلونکي منشي په توګه ټاکل کیږي
د عربي هېوادونو د بهرنیو چارو وزیرانو، نن یکشنبه د وري پر ۹مه نېټه په یوه ویډیويي غونډه کې په اکثریت سره د مصري ډیپلومات نبیل فهمي نوم د عرب هېوادونو د ټولنې د راتلونکي عمومي منشي په توګه غوره کړی. هغه به د راتلونکې جون میاشتې په وروستیو کې خپله دنده پیل کړي.
د راپورونو له مخې، نبیل فهمي به د احمد ابوالغیط ځای ناستی شي، چې دویمه دوره یې د ۲۰۲۶کال په جون میاشت کې پای ته رسېږي.
دغه پرېکړه د ویډیو کنفرانس له لارې شوې ده او د عرب لیګ ټولنې د منشور له مخې، عمومي منشي باید لږ تر لږه د غړو هېوادونو د دوه پر درېیمه اکثریت رایو وټاکل شي.
که څه هم د عرب لیګ ټولنې منشور د عمومي منشي لپاره ځانګړې تابعیت نه دی ټاکلی، خو دا څوکۍ عموماً د مصر له خوا نیول شوې ده، چې دا د عرب لیګ ټولنې د مرکزي دفتر د موقعیت له امله د قاهرې رول ته اشاره کوي.
یواځې یوه استثنا د تونس پخوانی ډیپلومات چدلي کلیبي و، چې له ۱۹۷۹تر ۱۹۹۰پورې یې دا دنده پر غاړه درلوده.
