د افغانستان د ازادو مبارزو لوبغاړي د پاکستاني لوبغاړو پر وړاندې د سیالۍ ډګر ته ښکته کېږي
د افغانستان د «اېماېماې» یا ازادو مبارزو ورزشکاران صبغتالله حکیمي، سجاد خان او خلیل ارسلاني د «اېنفینټ» سازمان د ازادو مبارزو په څلورم پړاو کې د پاکستاني لوبغاړو پر وړاندې سیالي تر سره کوي.
ټاکل شوې ده، چې دغه سیالۍ د روانې وري میاشتې په ۲۲مه نېټه د پاکستان په پلازمېنه اسلاماباد کې ترسره شي.
په دې لړ کې، د پاکستاني ضیا مشواڼي پر وړاندې د افغان لوبغاړي صبغتالله حکیمي لوبه د دې سیالیو د تر ټولو مهمې مبارزې په توګه غوره شوې ده. دا لوبه به په پنځو پړاوونو کې ترسره شي.
د «ټاپالوژي» معتبرې وېبپاڼې د خپرو شویو معلوماتو لهمخې، صبغتالله حکیمي تر اوسه یوه مسلکي سیالي په بریا سره ترسره کړې ده.
بلخوا، د پاکستان ضیا مشواڼی ۹ مسلکي سیالۍ ترسره کړې او په یادو سیالیو کې یې ۶ ګټلي او په درېیو کې یې ماتې خوړلې ده. دغه پاکستانی لوبغاړی تر صبغتالله حکیمي ډېر تجربه لرونکی برېښي.
د دغو سیالیو په نورو برخو کې، د افغان لوبغاړی سجاد خان په ۵۷ کیلوګرامه وزن کې د پاکستاني حیدر ساتي پر وړاندې او بل افغان ورزشکار خلیل ارسلاني په ۶۱ کیلوګرامه وزن کې د پاکستاني سعد محسود پر وړاندې سیالي ترسره کوي.
