د ایراني پارلمان مشر محمد باقر قالیباف په څرګند ډول له امریکا سره هر ډول هوکړه رد کړه. قالیباف د یکشنبې په ورځ (د وري ۹مه) د جګړې د پیل د دېرشمې ورځې په مناسبت د امریکا د ولسمشر ډونالډ ټرمپ د ۱۵ مادهييزو شرطونو لړلیک ته اشاره وکړه او هغه یې «د امریکایانو یو ارمان» وباله.
قالیباف په دې اشارې سره چې «امریکا یوازې خپل ارمانونه بیانوي او هغه څه چې په جګړه کې یې لاس ته نه دي راوړي، د ۱۵ مادهييزو شرطونو په چوکاټ کې یې اعلانوي او په ډیپلوماسۍ کې یې لټوي»، ولیکل: «کله چې امریکایان د ایران د تسلیمولو په لټه کې وي، د دغو امریکایي ارمانونو په وړاندې ستاسو د بچیانو ځواب روښانه دی: هیهات منّا الذلّة (موږ هېڅکله ذلت نهمنو)».د وري په درېیمه نېټه د امریکا ولسمشر ویلي وو، چې د اسلامي جمهوري نظام له هغه لوړپوړي چارواکي سره چې په عمل کې د چارو واګې په لاس کې لري، خورا سختې او جدي خبرې اترې روانې دي. له دغو څرګندونو سمدستي وروسته د هغه کس د هویت په اړه ګنګوسې پیل شوې، چې په عملي ډول چارې اداره کوي. ډېریو رسنیو ولیکل، چې د ټرمپ هدف قالیباف و.قالیباف د ټرمپ له دې څرګندونو سمدستي وروسته په اېکس کې ولیکل: «زموږ خلک د تېري کوونکو بشپړ او پښېمانه کوونکی غچ غواړي». هغه په ضمني ډول د ځان لهخوا د «چارو د ادارې» موضوع ته هم غبرګون وښود او ویې لیکل: «ټول چارواکي تر دې موخې پورې د خپل رهبر او خلکو تر شا کلک ولاړ دي».قالیباف په پای کې ټینګار وکړ: «له امریکا سره هېڅ ډول مذاکره نه ده شوې». د قالیباف له دغه ټینګار سره سره، ډېریو رسنیو لا هم د امریکا د مذاکرې د لوري په توګه د هغه پر مطرح کېدو ټینګار کاوه.قالیباف چې په خپله د سپاه پاسداران د توغندیز پروګرام له بنسټ اېښودونکو څخه ګڼل کېږي، د خپل پیغام په بله برخه کې ولیکل: «تاسو ته ډاډ درکوم چې د الهي نصرت په برکت له دې جګړې به یوازې د بریا په صورت کې وځو، چې د دې فتحې نښې لا دمخه څرګندې شوې دي».د ایراني پارلمان مشر محمد باقر قالیباف په خپل پیغام کې د شیعهګانو د درېیم امام یوې مقولې ته اشاره وکړه: «زما په څېر څوک به د یزید په څېر له چا سره بیعت ونهکړي».دا په داسې حال کې ده، چې د اسلامي جمهوري نظام وژل شوي مشر علي خامنهيي هم تر په نښه کېدو وړاندې همدا جمله کارولې وه.
