د سپینې ماڼۍ ویانده: ایران په خصوصي مذاکراتو کې د امریکا له ځینو ټکو سره هوکړه کړې ده

د سپینې ماڼۍ ویاندې وویل: «په حقیقت کې لکه څنګه چې پوهېږئ، د تېرېدونکو بېړیو اوسنی بهیر چې ۱۰ یې مخکې اعلان شوي وو او ۲۰ نورو ته یې په نږدې ورځو کې سترګې په لاره یو د متحده ایالاتو او ایران ترمنځ د مستقیمو او غېرمستقیمو خبرو اترو پایله ده. که په دې برخه کې د ولسمشر ډیپلوماسي او د هغه د ټیم هڅې نه وای، موږ به نن د دغو تېل وړونکو کښتیو شاهدان نه وو. موږ هیله من یو چې د ژمنتیا دا بهیر په راتلونکي کې هم دوام وکړي او دا هغه موضوع ده چې موږ پرې له نږدې کار کوو».
د سپینې ماڼۍ ویاندې زیاته کړه: «ایران په خصوصي مذاکراتو کې د امریکا له ځینو ټکو سره هوکړه کړې ده».
نوموړې ایران ته په خطاب کې وویل، چې د دغه رژیم لپاره تر ټولو غوره انتخاب یوه نوې هوکړه ده، که نه نو د امریکا وسله‌وال ځواکونه به له داسې وړتیاوو کار واخلي چې د تهران له تصور څخه پورته دي.
د سپینې ماڼۍ د ویاندې په وینا: «ولسمشر تل ویلي چې ډیپلوماسي د هغه لومړی انتخاب او لومړیتوب دی. هغه د دې عملیاتو له پیل څخه وړاندې په صادقانه ډول هڅه وکړه، چې د ایران له رژیم سره ډیپلوماسۍ ته دننه شي او غوښتل یې یوې هوکړې ته ورسېږي. د همدې موخې لپاره یې خپل غوره مذاکره کوونکي واستول. هغوی ډېر وخت او پراخې هڅې وکړې، ترڅو یوې پایلې ته ورسېږي، خو له بده مرغه ډېری پخواني مشران چې اوس زموږ ترمنځ نشته، د متحده ایالاتو د نظامي اقداماتو د پایلو له امله له خپل برخلیک سره مخ شول. له همدې امله، که د هوکړې لپاره کوم فرصت برابر شي، ولسمشر اورېدو ته چمتو دی، خو دا موضوع د ټاکل شویو نظامي موخو په وړاندې د هغه د تمرکز خنډ نه‌ګرځي».
د سپینې ماڼۍ ویاندې ټینګار وکړ: «روبیو نن وویل چې د ایران رهبري ډېره ټوټه ټوټه شوې ده. موږ واقعاً د دوی داخلي ارتباطي سیسټمونه فلج کړي دي او دا د ډیپلوماسۍ د بهیر یوه برخه ده ترڅو په دقیق ډول مشخصه کړو چې څوک مسوول دی. زه پوهېږم چې یو نوی ایت‌الله ټاکل شوی دی، خو له هغه څخه مو ډېر څه نه دي اورېدلي او نه مو لیدلي دي. نو دا د روانې ډیپلوماسۍ د بهیر یوه برخه ده».