د ورښتونو له امله د کابل ولایت د قرغې بند د اوبو کچه لوړه شوې
د طالبانو د اوبو او انرژۍ وزارت ویلي چې د وروستیو ورښتونو له امله د کابل ولایت د قرغې بند د اوبو کچه لوړه شوې ده. د یاد وزارت په وینا، د اوبو په کچه کې دا زیاتوالی هیله بښونکی دی او کولای شي د هېواد د اوبو زېرمو په پیاوړتیا کې مهم رول ولوبوي.
د طالبانو چارواکو زیاته کړې چې د بند د اوبو زیاتوالی به د کرنې سکتور ته ګټه ورسوي، د اوبو د مدیریت وضعیت به ښه کړي او د اقتصادي پرمختګ لپاره به مناسب فرصتونه برابر کړي.
دوی ټینګار کړی چې د وروستیو بارانونو اغېزې نه یوازې د اوبو په زېرمو کې مثبت بدلون راوستی، بلکې د وچکالۍ د اغېزو په کمولو کې هم مرسته کولای شي.
خو دا په داسې حال کې ده، چې وروستیو ورښتونو د هېواد په ډیرو ولایتونو کې ځاني او مالي زیانونه هم اړولي دي.
د طالبانو د ملي پېښو د مدیریت ادارې ویاند ویلي، چې په تېرو دوو ورځو کې د هېواد په ۱۳ ولایتونو کې د ورښتونو، سېلابونو او نورو موسمي پېښو له امله ۲۸ کسان مړه شوي، ۴۹ تنه ټپیان شوي او ۱۱۳۰ کورونه زیانمن شوي دي.
