په ننګرهار کې د طالبانو والي او د ایران سرکونسل د اقتصادي همکاریو پر پراختیا غږېدلي
د طالبانو د ننګرهار ولایت د رسنیو دفتر وایي، چې ملا محمد نعیم اخوند په یاد ولایت کې د ایران د اسلامي جمهوریت له سرکونسل مجید رضا پناه سره لیدلي او د اقتصادي همکاریو د پراختیا په اړه یې خبرې اترې کړي دي.
په خپره شوې خبرپاڼه کې راغلي، چې دواړو لوریو د افغانستان او ایران ترمنځ د سوداګریزو او اقتصادي اړیکو پر دوام، پیاوړتیا او پراختیا ټینګار کړی دی.
د معلوماتو له مخې، په دې لیدنه کې د افغاني او ایراني توکو د نندارتون جوړولو، د سوداګرو ترمنځ د اړیکو پراختیا، د کرنې او مالدارۍ سکتور پیاوړتیا او د روغتیايي برخې د ظرفیت لوړولو په اړه خبرې شوې دي.
همداراز دواړو خواوو ژمنه کړې چې په بېلابېلو برخو کې به ګډ کار ته دوام ورکړي او د متقابلو همکاریو د پراخولو لپاره به هڅې زیاتې کړي.
په دې ناسته کې د دواړو لوریوترمنځ پر ځینو سیاسي او ډیپلوماتیکو موضوعاتو او ګډو مسایلو هم خبرې شوې او د دوهاړخیزو اړیکو د لا پیاوړتیا هوکړه شوې ده، خو جزئیات یې نه دي ورکړل شوي.
