د بلوچستان په هرنایي ولسوالۍ کې ځايي پولیس وايي، د سکرو په یوه کان کې د یوې لویې ټوټې د راپرېوتو له امله یو افغان کانکېندونکی مړ شوی دی. د پولیسو په وینا، له دې سره تېره اوونۍ په بلوچستان کې د سکرو په کانونو کې د بېلابېلو پېښو له امله د مړو شویو افغانانو شمېر درېیو ته ورسېد.
د ځايي پولیسو په وینا، وروستۍ پېښه هغه مهال رامنځته شوه چې د بسمالله په نوم یوه کانکېندونکي د کان دننه کېندنه کوله او د یوې لویې ډبرې د راپرېوتو له امله ځای پر ځای مړ شو. پولیس وايي، ژغورونکو ډلو د نوموړي مړی له کان څخه را اېستلی او د هرنایي ولسوالۍ مرکزي روغتون ته یې لېږدولی دی.
تر دې وړاندې د مارچ په ۲۵مه هم د بلوچستان په دکۍ ولسوالۍ کې د سکرو په یوه کان کې د ورته پېښې له امله دوه افغان کانکېندونکي مړه شوي وو. په بلوچستان کې تر دې وړاندې هم په ورته پېښو کې ګڼو افغان کارګرو خپل ژوند له لاسه ورکړی دی.
