د طالبانو سترې محکمې خبر ورکړی، چې په دایکنډي ولایت کې یې ۴ کسان په عام محضر کې په دُرو وهلي دي. د یادې محکمې لهخوا په خپرې شوې خبرپاڼه کې راغلي، چې دغه کسان یې «د روژې خوړولو او د شرابو د لېږد» په تور په دُرو وهلي دي.
د خبرپاڼې له مخې؛ دغه کسانو ته له دوو میاشتو څخه تر دوو کلونو پورې د تنفيذي بند او له ۲۰ څخه تر ۳۹ دُرو سزا ورکړل شوې ده.
طالبانو تېره ورځ هم په جوزجان، بلخ او هرات ولایتونو کې ۱۴ کسان په دُرو وهلي او په بند یې محکوم کړي وو.
د طالبانو د کورنیو چارو وزارت وایي، د جنایي جرمونو د مخنیوي ځواکونو په پنځو ولایتونو کې ۲۱ تنه د غلا او نورو جنایي جرمونو په تړاو نیولي. وزارت همدا ډول زیاتوي، په لغمان کې د قومونو ترمنځ د وسلهوالې نښتې مخه نیول شوې.
د وزارت لهخوا خپره شوې خبرپاڼه کې ویل شوي چې د بادغیس په مرکز قلعهنو ښار کې اووه تنه د وسایطو او د کورونو د غلا په تړاو نیول شوي دي. همدارنګه څلور تنه په پروان کې د مبایلونو د غلا په تړاو، درې تنه په سرپل کې د موټرسایکلونو د غلا او یو تن د څارویو د غلا په تړاو نیول شوی دی. درې نور کسان د هرات په ولایت کې د غلا په تړاو نیول شوي دي.
په خبرپاڼه کې همدا راز راغلي، په لغمان کې امنیتي ځواکونو د علیشنګ ولسوالۍ د کهنهپال درې په منجلام او خندلي کلیو کې د دوو قومونو د وسلهوالې نښتې مخه نیولې. له پېښې وروسته امنیتي ځواکونه پر وخت سیمې ته ورسېدل او له دواړو لورو یې لس تنه له ۱۱ میله وسلو سره ونیول.
د وزارت په خبرپاڼه کې راغلي، د نیول شوو کسانو پر ضد څېړنې روانې دي او زر به له بشپړو اسنادو سره اړوندو عدلي او قضایي ارګانونو ته وسپارل شي.
د لغمان امنیه قومندانۍ د ولسونو څخه غوښتنه کړې چې ټولې شخړې دې د قانون په رڼا کې حل کړي او د خپلسرو کړنو څخه دې ډډه وکړي، ترڅو عامه نظم او امنیت ګډوډ نه شي.
رویټرز په یوه راپور کې ویلي چې پاکستان او طالبان د لنډمهاله اوربند وروسته یو پر بل بریدونه کړي او په امن سیمو کې یې تاوتریخوالی زیات کړی، خو اسلام اباد د دې ترتینګلتیا پر مهال د امریکا او ایران ترمنځ د خبرو کوربه توب ته چمتوالی نیسي.
د رویټرز د راپور له مخې؛ پر ډیورنډ کرښه دا نښتې د یکشنبې په ورځ وشوې، چې په همدې ورځ پاکستان د منځني ختيځ په جګړه کې سیمه ییز قدرتونه د تاوتریخوالي کمولو ته را وبلل او اعلان یې وکړ چې اسلام اباد کولی شي په راتلونکو ورځو کې د دغو خبرو کورب توب وکړي.
په راپور کې د دواړو هېوادونو د چارواکو له قوله ویل شوي چې د طالبانو او پاکستان ترمنځ په وروستۍ نښته کې درنې وسلې کارول شوي، چې یوه لوري ته پر کونړ او بل خواته د باجوړ په سیمو کې بریدونه شوي.
رویټرز د طالبانو د مرستیال ویاند حمدالله فطرت له قوله زیاته کړې چې د پاکستان په وروستي برید کې د ښځو او ماشومانو په ګډون یو کس وژل شوی او ۱۶ نور ټپیان شوي دي.
طالب سرچینو دا هم ویلي چې پاکستان ته یې د برید ځواب ورکړی خو د دوی په خبره ملکيځایونه یې نه دي به نښه کړي. پاکستان پوځ د رویټرر پوښتنې ته ځواب ندی ورکړی.
د پاکستان او طالبانو ترمنځ په وروستیو کلونو کې تر ټولو سخته جګړه د تېرې میاشتې په پیل کې وشوه چې دواړو خواوو ته یې درانه زیانونه واړول.
کابل ویلي، چې د دې میاشتې په پیل کې د افغانستان پر پلازمېنه د معتادینو د درملنې پر یوه مرکز د پاکستان په یوه هوايي برید کې تر ۴۰۰ ډېر کسان ووژل شوه.
پاکستان د طالبانو دا ادعاوې رد کړې او ویې ویل چې دوی «په دقیق ډول پوځي تاسیسات او د ترهګرو د ملاتړ بنسټونه په نښه کړي دي».
ترکیې، قطر او سعودي عبرستان د کوچني اختر په مناسبت د جګړې درولو غوښتنه وکړه، پاکستان تېره اوونۍ دا اوربند پای ته ورسوه.
کابل لا تر اوسه په رسمي ډول نه دي ویلي، چې ایا د دوی له لوري اوربند لا هم پر ځای دی که نه.
اسلاماباد افغان طالبان تورنوي چې وسلوالو ته پناه ورکوي او په پاکستان کې د بریدونو د ترسره کول لپاره یې ملاتړ کوي. کابل دا تورونه ردوي او وایي چې دا ستونزه د پاکستان کورنۍ مسله ده.
د ملګرو ملتونو د بشري مرستو د همغږۍ دفتر (اوچا) اعلان وکړ چې د افغانستان په ځینو سیمو کې د سختو بارانونو او ناڅاپي سېلابونو له امله څو کسان مړه او ټپیان شوي دي. اوچا همدارنګه وویل چې د خلکو ژوند اغېزمن شوی او د هغوی بنسټیزې اسانتیاوې او کورونه زیانمن شوي دي.
د ملګرو ملتونو د بشري مرستو د همغږۍ دفتر وویل چې دوی له خپلو شریکانو سره یو ځای د خلکو د بېړنیو اړتیاوو د ارزونې او ځواب ویلو په حال کې دي.
د طالبانو د پېښو پر وړاندې د مبارزې ادارې د یکشنبې په ورځ اعلان وکړ چې د بارانونو او سېلابونو له امله په څو ولایتونو کې لږ تر لږه ۱۷ کسان مړه شوي دي.
دې ادارې زیاته کړه چې د سختو بارانونو له کبله په بادغیس، سرپل، پروان، دایکندي، لوګر، میدان وردګ، فراه، هرات، غور، سمنګان، فاریاب، جوزجان او لغمان ولایتونو کې سېلابونه راوتلي دي.
طالبان وایي چې د سختو بارانونو او سېلابونو له امله د افغانستان ځینې لویې لارې د ترافیکو پر مخ تړل شوې دي.
دوی همدا رنګه له خلکو غوښتي، چې پلونو، سیندونو او ټیټو سیمو ته له نږدې کېدو څخه ډډه وکړي.
د طالبانو کورنیو چارو وزارت وايي چې په غور کې یې د عملیاتو پر مهال د نشه يي توکو د تولید او پروسس یوه کارخونه له منځه وړې او پر مهال یې ۲ زره کیلوګرامه اومان تر نیولو وروسته سوځولي دي. طالبانو په اروزګان کې هم د ۲۴۷۰ کیلوګرامه اومان نشه يي توکو د له منځه وړلو خبر ورکړی.
د اروزګان د طالبانو امنیه قومندانۍ د دوشنبې په ورځ ( د وري ۱۰مه) په یوه خبرپاڼه کې ویلي چې د چورې ولسوالۍ په خواجه خدیر سیمه کې یې ۲۲۵۰ کیلوګرامه او د نوري په سیمه کې یې ۲۲۰ کیلوګرامه اومان نشه يي توکي نیولي او سوځولي دي.
د طالبانو کورنیو چارو وزارت په یوه جلا خبرپاڼه کې زیاته کړې چې په غور کې یې د نشه يي توکو د پروسس او تولید یو کار خونه او ۲ زره کیلوګرامه اومان سوځولي دي.
یاد وزارت زیاته کړې چې په دولت یار ولسوالۍ کې یې دوه کسه د نشه يي توکو د تولید لپاره د کارېدونکو موادو سره نیولي او تر لومړنیو پلټنو وروسته به عدلي ارګانونو ته وسپارل شي.
طالبانو ټینګار کړی چې چاته به د نشه ييتوکو د کر، تولید او پلور اجازه ور نه کړي او له سرغړونکو سره به قانوني چلند وشي.
طالبانو ادعا کړې چې په افغانستان کې یې د نشه ييتوکو په وړاندې مبارزه جدي ده او دا کچه یې صفر ته رسولې؛ خو ګاونډي هېوادونه په خاص ډول ایران لا هم د افغانستان څخه د نشه يي توکو د قاچاق له کبله وخت ناوخت اندېښنې وړاندي کوي.
د طالبانو امر بالمعروف وزارت وایي، مسولینو یې په غزني او هلمند کې د څلورو مېرمنو د جبري او غیر شرعي نکاح ګانو مخنیوی کړی او هغوی یې له خپلو شرعي حقونو برخمنې کړې.
ددغه وزارت له خوا په خپره شوې خبرپاڼه کې راغلي، یادې مېرمنې د بېمعنی دودونو او غیرت پر بنسټ د غیر شرعي نکاح لپاره مجبورې شوې وې، خو د دوی له لوري یې مخه ونیول شوه.
خبرپاڼه کې راغلي، دوی د کورنیو غړو ته هم سپارښتنه وکړه، چې په راتلونکي کې د دغسې ناوړه کړنو له تر سره کولو ډډه وکړي.
مسولینو ټینګار کړی، چې د ټولنې د دیني ارزښتونو او په ځانګړي ډول د مېرمنو د شرعي حقونو د خوندي ساتلو لپاره به خپلې هڅې لا نورې ګړندۍ کړي.