شهباز شریف: د تېلو د بیو د اغېزو کمولو لپاره به منځني قشر ته لا زیاتې مرستې ورکړل شي
د پاکستان لومړي وزیر شهباز شریف په منخي ختیځ کې د شخړو له امله د تیلو د بیو لوړوالي په اړه یوې غوندې ته ویلي چې حکومت به د اقتصادي کمزورو او منځني قشر لپاره د لا زیاتو اسانتیاوو برابرولو ته دوام ورکړي.
په اسلاماباد کې د لومړي وزیر تر مشرۍ لاندې غونډه کې د تېلو د بیو د لوړوالي پر احتمالي اغېزو، د موجودو زېرمو او د خلکو لپاره د مرستو په تطبیق، لومړي وزیر شهباز شریف ویلي، د دولتي لګښتونو کمولو او سپما له لارې د ترلاسه شویو پیسو برخه به د خلکو د ملاتړ لپاره وکارول شي.
نوموړي ویلي چې د موټرسایکل او ریکشا لرونکو د ثبت پروسه د ایالتي حکومتونو په همکارۍ چټکه کېږي، او د ډیجیټلي سیستم له لارې به مرستندویه پروګرامونه مستقیم خلکو ته ورسېږي. نوموړي ټینګار کړی چې د نړیوال بحران سره سره په هېواد کې د سونتوکو رسونه پرته له خنډه روانه ساتل شوې ده.
