د بلوچستان په جهل مګسي کې پر پولیسو برید؛ یو ماشوم وژل شوی او څو تنه ټپیان دي
د پاکستان د بلوچستان ایالت په جهل مګسي ولسوالۍ کې د پولیسو په حوزې د وسلوالو په برید کې یو ماشوم وژل شوی او څو تنه نور ټپیان دي. په ټپیانو کې د حوزې د پولیسو مشر هم شامل دی.
د بلوچستان د جهل مګسي ولسوالۍ د کوټړو په سیمه کې وسلوالو د پولیسو پر یوې حوزې برید کړی دی. د همدې ولسوالۍ د روغتون مسول ډاکټر علي خان مګسي افغانستان انټرنشنل ته ویلي، چې له برید وروسته د یوه وژل شوي ماشوم جسد او پنځه ټپیان روغتون ته لېږدول شوي دي.
د هغه په وینا، په ټپیانو کې د پولیسو د حوزې مشر حسین سپره په ګډون درې پولیس سرتېري شامل دي.
په همدې حال کې، راپورونه ښيي چې تېره شپه د بلوچستان په بېلابېلو سیمو کې هم هممهاله بریدونه شوي دي. د بلوچستان د کورنیو چارو وزارت مرستیال بابر یوسفزي ویلي، چې د ایالت په مرکز کوټه ښار کې د بریدونو له امله پنځه تنه ژوبل شوي دي.
سرچینې زیاتوي چې په خاران، نوشکي، ډېره بګټي او مستونګ ولسوالیو کې هم د ډزو او چاودنو پېښې شوې دي، چې له امله یې یو ملکي وګړی وژل شوی او ۱۲ نور ټپیان دي.
تر اوسه پورې کومې وسله والې ډلې د دغو بریدونو پړه پر غاړه نه ده اخیستې.
