پاکستان د امریکا او ایران ترمنځ د مذاکراتو پیلېدو ته هیلېمندي ښودلې ده
په اسلاماباد کې د مصر، سعودي عربستان او ترکیې د بهرنیو چارو وزیرانو له سفر وروسته یوه لوړپوړي پاکستاني چارواکي الجزیرې ټلوېزیون ته ویلي، چې پاکستان د امریکا او ایران له جګپوړو چارواکو سره په مشورو بوخت دی او د دواړو خواوو ترمنځ د مذاکراتو پیلېدو ته هیلهمندي شته.
دغه پاکستاني چارواکي اعلان وکړ، چې هېواد یې د امریکا او ایران ترمنځ پیغامونه تبادله کړي او زیاته یې کړه: «دواړه لوري خبرو اترو ته د ننوتلو لپاره جدي لېوالتیا لري».
هغه همدا راز ټینګار وکړ، چې له دې لېوالتیا سره سره د دواړو هېوادونو دننه او بهر ګڼ خنډونه شتون لري او تر ټولو مهم بهرنی خنډ یې اسراییل یاد کړ.
دغه پاکستاني چارواکي وویل: «اسراییل په سیمه کې سوله نه غواړي او هڅه کوي د سیمې هېوادونه یو د بل پر وړاندې ودروي».
هغه زیاته کړه، چې د سیمې د هېوادونو ترمنځ جګړه نه عاقلانه ده او نه هم شونې.
دا بدلونونه په داسې حال کې رامنځته کېږي، چې په تېرو څو اوونیو کې د ایران، امریکا او اسراییل ترمنځ کړکېچ په بېساري ډول زیات شوی او د سیمې هېوادونه د ترینګلتیاوو د کمولو او د جګړې د پراخېدو د مخنیوي لپاره هڅې کوي.
