د امریکا د کانګرس غړي رنډي فاین خبرداری ورکړی، چې طالبان خپله واکمني لا پسې ټینګوي او داسې نوي قوانین وضع کوي چې خلک تر بل هر وخت ډېر تر فشار لاندې راولي. هغه ټینګار کړی، چې دغه ډله باید په هېڅ صورت په رسمیت ونهپېژندل شي.
رنډي فاین نړۍ ته په خطاب کې ویلي، چې طالبان باید «هېڅکله او په هېڅ ډول» د کوم هېواد لهخوا په رسمیت ونهپېژندل شي. نوموړي د افغانستان له خلکو وغوښتل، چې د طالبانو پر وړاندې راپورته شي او خپل ځان له دغه «منفور رژیم او مذهبي ایډیالوژۍ څخه چې دا ډله یې استازیتوب کوي، وژغوري».
نوموړي طالبان یوه ترهګره ډله بللې او زیاته کړې یې ده، چې دا ډله ښځې ځپي او د خپلو مخالفانو غږونه خاموشه کوي.
د امریکا د کانګرس دغه غړی په داسې حال کې د طالبانو پر نه رسمیت پېژندلو ټینګار کوي، چې ځینو هېوادونو د بشري حقونو تامین په ځانګړې توګه د ښځو حقونه، د ټولګډونه حکومت جوړول او له ترهګرۍ سره مبارزه د دغې ډلې د رسمیت پېژندنې لپاره د شرطونو په توګه اعلان کړي دي.
خو رنډي فاین د دغو شرطونو پوره کېدل ناشوني وبلل او ویې ویل: «زه شک لرم چې طالبان به کله هم دا ډول بدلونونه راولي، ځکه دا ډله له مذهبي پلوه په دې باور ده چې داسې څه نهشي کولی».
هغه زیاته کړه، چې طالبان له ښځو او نجونو سره خپل چلند له اخلاقي پلوه «موجه» بولي او پرې باور لري.
طالبان ادعا کوي، چې د «اسلامي شریعت» په چوکاټ کې یې د افغان ښځو او نجونو حقونه تامین کړي دي، خو پر افغانستان د دغې ډلې له واکمنۍ راهیسې دا هېواد په نړۍ کې یوازینی هېواد دی، چې ښځې او نجونې پهکې یوازې د خپل جنسیت له امله له خپلو بنسټیزو او انساني حقونو لکه زدهکړې، کار، سیاسي، مدني، ټولنیز او کلتوري فعالیتونو څخه بېبرخې شوې دي.
د ښځو پر وړاندې د طالبانو جنسیتي زیاتی او سیستماتیکه ځپنه د دې لامل شوې، چې د ملګرو ملتونو په ګډون ډېرو نړۍوالو سازمانونو دا وضعیت د «جنسیتي اپارټایډ» په توګه یاد کړی او د ښځو د حقونو د سیستماتیک نقض په اړه له طالبانو څخه د ځوابویلو غوښتنه وکړي.
دا په داسې حال کې ده، چې تېره پنجشنبه د امریکا د استازو جرګې د بهرنیو اړیکو کمېټې غړو د هغې لایحې ملاتړ وکړ، چې موخه یې د افغان ښځو او نجونو پر وړاندې د طالبانو د تبعیضي چلند څېړل او په اړه یې راپور ورکول دي. هغوی وویل، چې د دغې لایحې تصویب به د طالبانو د ادارې پر ځواب ویلو سربېره د هغوی پر وړاندې د امریکا د راتلونکو ګامونو په ټاکلو کې هم مرسته وکړي.
