د ایران د مجلس یوې کمېټې د هرمز تنګي لپاره د محصول لګولو طرحه تصویب کړه
د فارس خبري اژانس د دوشنبې په ورځ په خپله اېکسپاڼه کې لیکلي، چې د ایران د اسلامي شورا مجلس د ملي امنیت کمېسیون د هرمز تنګي د مدیریت طرحه تصویب کړې ده.
د دغه کمېسیون د یوه غړي په وینا، په دغه طرحه کې د هرمز تنګي امنیتي ترتیبات، د بېړۍ چلولو خوندیتوب، د چاپېریال ساتنې مسایل او مالي چارې شاملې دي، چې ورسره به د ایران د اسلامي جمهوریت او د هغه د وسلهوالو ځواکونو حاکمیتي رول پلی شي.
په دې طرحه کې دغه راز د امریکایانو او اسراییلیانو پر تګراتګ بندیز او د هغو هېوادونو پر بېړیو بندیز هم په پام کې نیول شوی، چې د ایران پر وړاندې د دغو دوو هېوادونو په جګړه کې برخه اخلي.
ایران د جغرافیایي موقعیت او نظامي شتون له امله په هرمز تنګي کې مهم رول لري او د نړۍ په یوې تر ټولو حساسې سمندري لارې واکمن دی.
پر ایران د امریکا او اسراییل د هوایي بریدونو له پیل وروسته له دې لارې د کښتیو تګراتګ له خنډ او ځنډ سره مخ شوی او د تېلو او ګازو د لېږد یوه برخه درېدلې ده. دغه راز په دې لاره کې نظامي ګواښونو او ناامنیو د کښتیو تګراتګ کم کړی دی.
دې وضعیت نړۍوالې اندېښنې زیاتې کړې دي، ځکه په هرمز تنګي کې هر ډول ګډوډي د تېلو بیې لوړولی شي، د اکمالاتو نړۍواله لړۍ ګډوډوي او د خلیج د هغو هېوادونو پر اقتصاد اغېز کوي چې پر انرژۍ تکیه دي.
