د پاکستان ټاکنیز کمېسیون د بلوچستان په خضدار ولسوالۍ کې د د پارلماني څوکۍ لپاره ضمني ټاکنې د ناامنۍ له امله ځنډولي. دغه ټاکنې د روان کال د اپریل په پنځه مه نېټه پلان شوې وې، خو امنیتي او سیاسي ستونزې یې ترسره کېدل ناممکن کړل.
د بلوچستان نیشنل ګوند مرکزي موقتي مشر، ساجد ترین، افغانستان انټرنشنل پښتو ته وویل: «دا نړۍ ته ښکاره ده چې د بلوچستان په خضدار کې د حکومت واک نشته. په ځانګړې توګه د خضدار زهري سیمه اوس هم ګرځبندیز لاندې ده او ځايي خلک نه شي کولی په ازاده توګه ښار ته تګ راتګ وکړي. هلته رڼې ټاکنې نه شوې کیدی.»
ښاغلي ترین زیاته کړه چې د پارلمان ۲۵۶څوکۍ د ګوند مشر، سردار اختر جان مینګل، د احتجاج په توګه پریښوده، ځکه چې هغه غوښتل د بلوچستان ځپل شوي خلک په قامي اسمبلۍ کې څرګند کړي، خو د پاکستان واکدارانو له دې څخه مخنیوی وکړ. هغه وویل: «بلوچستان کې روان وضعیت یوه ورځ کې نه دی رامنځته شوی، بلکې د ۷۵ کالو راهیسې د بلوچستان له اولس سره د ناوړه چلند اوږده کیسه ده.»
د هغه په وینا، «د بلوچستان خلکو وار په وار ویلي چې اسلام اباد له دوی سره مینه نه لري، بلکې د بلوچستان شتمنۍ غواړي. اوس د شتمنیو تر څنګ د خلکو سیاسي واک هم اخیستل شوی دی.»
په ورته وخت کې د جمعیت علما اسلام ګوند مرکزي غړی او سناتور کامران مرتضی افغانستان انټرنشنل پښتو ته وویل: «په پاکستان کې کله هم رڼې ټاکنې نه دي شوي، په ځانګړې توګه د کال ۲۰۲۴ټول ټاکنو باندې د هېواد زیاتره سیاسي ګوندونو نیوکې کړې وې او دغه ټاکنې یې له درغلیو ډکې بللې.»
سناتور مرتضی هم یادونه وکړه چې د روانې میاشتې په لومړیو کې په قلات والسوالۍ کې د بلوچستان اسمبلۍ ټاکنې ترسره شوې، چې د دوی د ګوند نوماند ګټلې وې، خو د بلوچستان د کورنیو چارو اوسنی وزیر بریالی اعلان شو.
نوموړی همدا راز وايي چې د غلتیو پالیسو له امله داسې خلکو په ولس ګمارل کیږي چې د ولس ندي خوښ.
