د طالبانو کورنیو چارو وزارت وایي، د کابل ښار د پنځمې حوزې امنیتي ځواکونو په جلا عملیاتو کې د غلو یو شپږ کسیز بانډ او هم مهاله یې یو مسلح غل نیولی چې له یو کور څخه یې غلا کوله. وزارت وایي، په دغه عملیاتو کې یو عراده موټر هم تر لاسه شوی دی.
د کورنیو چارو وزارت په خبرپاڼه کې ویل شوي چې د پنځمې حوزې امنیتي ځواکونو د خلکو د شکایتونو او څارنې په پایله کې د غلو د بانډ پر ضد موثر عملیات ترسره کړي. د وزارت د خبرپاڼې له مخې دغه کسانو په موټرو کې له خلکو پیسې او نور قیمتي توکي غلا کول.
وزارت وایي هم مهاله یو مسلح غل هم نیول شوی چې د بانډ د فعالیتونو له لارې یې د خلکو مالونه غلا کړي وو.
خبرپاڼه زیاتوي چې د پولیسو لخوا له نیول شوو کسانو یو عراده موټر هم تر لاسه شوی، کوم چې د غلاوو په ترسره کولو کې کارول کېده.
ملګرو ملتونو په یوه راپور کې د افغانستان په اړه یادونه کړې چې په دغه هېواد کې لا هم د بشري حقونو کړکېچ دوام لري. دوی د طالبانو له خوا د نجونو او ښځو پر وړاندې پراخو بندیزونو ته اشاره کړې.
د ملګرو ملتونو د بشري حقونو دفتر د نوي راپور له مخې، چې ښځې او نجونې د طالبانونو د فرمانونو له لارې لا هم د عامه ژوند څخه لرې کیږي. نجونې ښوونځيو ته نه پرېښودل کیږي او د طب پوهنځيو لپاره له ښځو پرته ازموینې اخیستل کیږي.
په راپور کې راغلي چې له «حجاب پرته» ښځې له عامه ټرانسپورټه منع شوي او بازارونو او خدماتو ته د ښځو لاسرسی ستونزمن شوی دی.
د ملګرو ملتونو په راپور کې راغلي چې په ټول افغانستان کې د دوی دفترونو ته د ښځينه کارکوونکو، قراردادیانو او مېلمنو ورتګ منع شوی.
د ملګرو ملتونو د بشري حقونو مشر ولکر تورک د راپور د وړاندې کولو پر مهال وویل: «په عملي توګه حاکمو چارواکو د ښځو او نجونو حضور په عامه ژوند کې جرم ګرځولی دی. ښځې او نجونې اوسنی او راتلونکی دي او هېواد له هغوی پرته وده نه شي کولی».
په راپور کې په عام محضر کې د خلکو وهلو، پر رسنیو بندیزونو او د خبریالانو نیونو او بندي کولو ته هم اشارې شوي.
طالبانو په کابل پوهنتون کې د ژمنپاڼو په وېشلو سره له محصلانو غوښتي، چې د دغې ډلې لارښوونو ته ژمن پاتې شي. په دې ژمنپاڼو کې له محصلانو غوښتل شوي، چې د ږیرې پرېښودلو، د خولۍ پر سر کولو، په لمانځه کې د ګډون، د موسیقۍ نه اورېدلو او د طالبانو له اصولو سره د سم چلند ژمنه وکړي.
افغانستان انټرنشنل ته رسېدلي اسناد ښيي، چې د طالبانو چارواکو له محصلانو غوښتي څو دغه ژمنپاڼې لاسليک کړي.
د دې ژمنپاڼې په بېلابېلو برخو کې راغلي، چې محصلان مکلف دي څو لمونځ په جماعت ادا کړي، خپلې ږېرې اوږدې وساتي او د سر وېښتان دې په داسې بڼه نه سموي چې د طالبانو له نظر سره مخالفه وي. همدارنګه، محصلان نهشي کولی له خولۍ پرته پوهنتون ته داخل شي او اړ دي چې جامې واغوندي.
دغه نوی امر يوازې د کابل دولتي پوهنتون پورې محدود نه دی. په کابل کې د يو خصوصي پوهنتون يوه زدهکړیال افغانستان انټرنشنل ته يو مکتوب لېږلی، چې پهکې ښکاري له هغوی څخه هم غوښتل شوي چې ږیره پرېږدي او جامې واغوندي.
هغه ويلي، چې د طالبانو لارښوونې او خبرداري محصلان ناهيلې کوي.
د زدهکړیالانو پر سنيتوب ټينګار
هغه محصلان چې د کابل پوهنتون ژمنلیک لاسليکوي، بايد ژمنه وکړي چې د «اسلامي امارت نظام» شرعي ګڼي او اطاعت ترې اړين بولي.
د دې ژمنلیک په يوه ماده کې راغلي، چې د افغانستان خلک د «اهل سنت او جماعت» پيروان دي. له همدې امله له محصلانو غوښتل شوي، چې ژمنه وکړي څو د همدې مذهب پيروي کوي او اطاعت ترې کوي. همدارنګه طالبانو له زدهکړیالانوغوښتي، چې د امر بالمعروف قانون ته ځانونه ژمن وبولي.
په افغانستان کې د اهل سنت تر څنګ د جعفري او اسماعيلي شيعهګانو لويه ټولنه هم ژوند کوي. خو طالبان تل د اهل سنتو پر بنسټ د قوانينو پر حاکميت ټينګار کوي او پر شيعهګانو محدوديتونه لګوي.
د تېر کال د مرغومې په ۱۵مه د طالبانو مشر هبتالله اخوندزاده د «محاکمو جزايي اصولنامه» توشيح کړه. د دې اصولنامې په اتمه ماده کې راغلي، هر څوک چې د «اهل سنت او جماعت» خلاف عقيده ولري، «مبتدع» بلل کېږي.
همدارنګه په ۲۶مه ماده کې ويل شوي، چې که څوک له حنفي مذهب څخه ووځي، تر دوو کلونو پورې د بند سزا به ورکول کېږي. دا په داسې حال کې ده، چې د افغانستان د ۱۳۸۲ کال اساسي قانون محکمو ته اجازه ورکوله، چې د شيعه وګړو په شخصي چارو کې د شيعه فقه تطبيق کړي.
له سياسي ډلو سره د اړيکو بنديز
په دې ژمنلیک کې طالبانو زدهکړیالان اړ کړي، چې سياسي فعاليت ونهکړي او له «سياسي ډلو» سره اړيکې ونهنيسي.
د طالبانو تر واکمنۍ لاندې په افغانستان کې ګوندونو ته د رسمي فعاليت اجازه نشته. طالبانو د ۱۴۰۲ کال د زمري په ۲۵مه په ښکاره اعلان وکړ، چې د ټولو سياسي ګوندونو فعاليت منع دی. د طالبانو د عدليې وزير عبدالحکيم شرعي ويلي، چې ګوندي فعاليت «شرعي بنسټ» نهلري او «د ملي ګټو پر ضد» دی، له همدې امله هېڅ سياسي ګوند ته په هېواد کې د فعاليت اجازه نه ورکول کېږي.
د ترکیې پولیسو د دوشنبې په ورځ اعلان وکړ، چې د شرناک ښار په انداچ کلي کې یې د یو لړ عملیاتو پر مهال ۲۴ افغان کډوال چې په ناقانونه توګه هلته مېشت وو، نیولي دي. پولیسو همداراز درې تنه د دغو کډوالو د قاچاق او لېږد په تور نیولي او عدلي ارګانونو ته یې سپارلي دي.
تورن کسان له اداري او قضايي پړاوونو تر تېرېدو وروسته زندان ته لېږدول شوي دي او د ترکيې پوليسو ويلي، چې د نورو شپږو شکمنو کسانو د نيولو لپاره لا هم عمليات روان دي.
افغان کډوال هم د اداري بهير تر بشپړېدو وروسته د بېرته ستنېدو مرکزونو ته لېږدول شوي، څو افغانستان ته واستول شي.
یاده دې وي، چې افغانان په ترکيه کې د نيول شويو کډوالو په نوملړ کې لومړی ځای لري. د دې هېواد پوليسو په تېرو درېيو مياشتو کې شاوخوا ۸ زره افغان کډوال نيولي دي.
د ترکيې د کورنيو چارو وزارت مخکې ويلي وو، چې د ناقانونه کډوالو د پېژندنې، نيولو او اېستلو عمليات به د هېواد په کچه دوام ولري.
په کابل کې یو شمیر افغان متقاعدینو د خپلو معاشونو په تړاو یوځل بیا اعتراض او لاریون کړی. تېر کال طالبانو اعلان وکړ چې د زمري له دویمې څخه به د دولتي ادارو د متقاعدانو د معاشونو ورکول بیا پیل شي خو متقاعدین وايي، نږدې ۷میاشتې تېرې شوې او دغه ژمنه لا هم بشپړه نه ده عملي شوې.
یو شمیر افغان متقاعدینو نن دوشنبه، د وري پر لسمه، په کابل کې د تقاعد ریاست مخې ته راټول شوي وو او د طالبانو پر مشرتابه یې غږ وکړ، چې نور دې دوی نه ځوروي.
په تېرو څلورو کلونو کې متقاعدین په وار، وار د تقاعد حق اخیستلو لپاره د کابل د تقاعد ریاست مخې ته راغونډ شوي، چې خپل هغه حق ترلاسه کړي چې د ماموريت پر مهال به يې له تنخوا څخه د دولت خزانې ته ورکاوه.
د طالبانو حکومت بیا ویلي، چې متقاعدین باید د خپلو حقونو د ثابتولو لپاره ځانګړې محکمې ته مراجعه وکړي.
د طالبانو د مالیې وزارت ویلي و، چې د دغې ډلې د مشر ملاهبت الله د فرمان پر بنسټ د ټاکل شويو اصولو له مخې متقاعدینو ته د تقاعد حقونو د ورکولو پرېکړه شوې ده، خو متقاعدین نیوکه کوي، چې اړوندې ادارې دغه امر نه مني.
د ۱۴۰۳کال د مرغومي په لومړۍ نېټه د طالبانو مشر ملاهبت الله اخوندزاده د متقاعدینو د حقونو د څېړلو لپاره د ځانګړو محکمو د جوړولو امر وکړ، خو اوس د اعتراض کوونکو لویه نیوکه دا ده چې د ټیټې کچې طالبان او مامورین دغه فرمان نه پلی کوي.
والدای د خبرو اترو مرکز وایي، چې د روسیې او ازبکستان چارواکي په یو دوه ورځني ګډ کنفرانس کې، چې د وري میاشتې پر ۱۰ او ۱۱نېټو په ترمذ ښار کې کېږي، د افغانستان وضعیت او د هغه د امنیتي اغېزو، سیمهییزو همکاريو او ستراتیژیکو بدلونونو په اړه مشورې کوي.
دغه دوه ورځنی کنفرانس د «والدای» د خبرو اترو مرکز او د ازبکستان د ستراتیژیکو مطالعاتو انستیتوت په کوربه توب جوړیږي، چې د دواړو هېوادونو ګڼ شمېر حکومتي چارواکي او کارپوهان به پکې ګډون ولري.
په ګډونوالو کې د روسیې د بهرنیو چارو وزارت مرستیال میخاییل ګالوزین، د ازبکستان د بهرنیو چارو وزارت سلاکار شوهرات یګیتالیف او د دواړو هېوادونو سفیران شامل دي.
د کنفرانس د جوړوونکو په وینا، دا غونډه د دوه هېوادونو د سیاسي او علمي استازو ترمنځ د نظرونو د تبادلې لپاره دودیزه بڼه لري.
په ترمذ ښار کې د دې غونډې د ترسره کولو موخه دا ده، چې یاد ښار له افغانستان سره نږدې او د «دوستۍ» د پل په څېر مهم ځای کې موقعیت لري.
د کنفرانس د بحث وړ مواردو په تړاو ویل شوي چې روسیه او ازبکستان دواړه له افغانستان سره په اقتصادي او امنیتي چارو کې د رغنده تعامل لپاره لېواله دي او په ځانګړې توګه په سویلي او ختیزې اسیا کې د ثبات ټینګښت ته ارزښت ورکوي.
سربېره پر امنیتي موضوعاتو، په دې غونډه کې د «شمال–جنوب» ټرانزیټي دهلېز پراختیا، کډوالي، اقلیمي بدلونونه، د اوبو سرچینې او د اقتصاد ډیجیټلي کول هم د بحث اړوند نور ټکي ګڼل شوي دي.