په بلوچستان کې وسلهوال بریدونه؛ درې امنیتي سرتېري وژل شوي او اووه نور ټپیان دي
د بلوچستان په مستونګ او جهل مګسي ولسوالیو کې د وسلهوالو په جلا جلا بریدونو کې لږ تر لږه درې امنیتي سرتېري وژل شوي او اووه نور ټپیان دي، چې ورسره د سیمې امنیتي وضعیت لا ترینګلی شوی دی.
ځایي سرچینې وایي، د مستونګ ولسوالۍ د لکپاس په سیمه کې ناڅرګندو وسلوالو د امنیتي ځواکونو پر یوې پوستې برید کړی دی. د معلوماتو له مخې، برید کوونکو د زاړه لکپاس پر سړک پر امنیتي پوستې ډزې کړي چې له امله یې څلور امنیتي سرتېري ټپیان شوي دي.
بلخوا، د جهل مګسي ولسوالۍ د نوراني پر سړک هم وسلهوالو برید کړی، چې په پایله کې یې یو امنیتي سرتېری وژل شوی او درې نور ټپیان دي.
ورته مهال، تېره شپه د کوټه ښار د خلجي کالونۍ ته څېرمه سیمه کې هم پر پولیسو برید شوی دی. سرچینې وایي، برید هغه وخت وشو چې پولیس پر ورځنۍ ګزمې بوخت وو، او د ډزو له امله دوه پولیس سرتېري ووژل شول.
د دغو بریدونو له امله د کوټې نه تر کراچۍ او کوټې نه تر تفتان لویې لارې د لنډ وخت لپاره د تګ راتګ پر مخ تړل شوې وې.
تر اوسه کومې ډلې د دغو بریدونو مسوولیت نه دی منلی.
