د امریکا د تابعیت او کډوالۍ خدماتو اداره له ځنډ وروسته د پناه غوښتنې قضیې بیا پیلوي
د امریکا د تابعیت او کډوالۍ خدماتو ادارې د دوشنبې په ورځ وویل چې د ټرمپ اداره به د ځینو پناه غوښتونکو د قضیو پروسس بیا پیل کړي. په امریکا کې د یو کډوال له خوا د ملي ګارډ پر دوو غړو د برید وروسته دغه غوښتنې درولې وې.
رویټرز په یوه راپور کې زیاته کړې چې د تابعیت او کډوالۍ خدماتو ادارې ویاند وویل: «دغه ادارې د هغو پناه غوښتونکو لپاره چې په بشپړه توګه ارزول شوي او د لوړ خطر لرونکو هېوادونو څخه نه دي، د دوسیو د ارزونې ځنډ ختم کړی دی» هغه زیاته کړه چې د کډوالو لپاره به سختې امنیتي پلټنې او ارزونې دوام ولري.
یادې ادارې دا نه دي ویلي چې کوم هېوادونه «د لوړ خطر نه» بلل کیږي.
واشنګټن په نومبر میاشت کې د پناه غوښتنې پروسه ځکه بنده کړه چې ټرمپ ادارې د بایډن د دورې ارزونې ناکامه وګڼلې چې له کبله یې یو افغان کډوال امریکا ته داخل شوی او د ملي ګارډ پر غړو یې برید کړی.
د دې پېښې نه مخکې هم د ټرمپ اداره د کډوالۍ پر ضد سخت کمپاین روان کړی و. د جولای په میاشت کې امریکا د ۱۲ هېوادونو پر وګړو د سفر بندیز ولګول او د ملي ګارډ پر غړو د برید وروسته دا بندیز نور هم پراخ شو او اووه نور هېوادونه هم پکې شامل شول.
