د بښنې نړۍوال سازمان خبرداری ورکړی، چې د فوټبال په میلیونونو مینهوال چې غواړي د ۲۰۲۶ کال په نړۍوال جام کې ګډون وکړي، د «بشري حقونو د پام وړ ګواښونو» سره مخ دي. دغه بنسټ وايي، دا سیالۍ له هغو «خوندي، ازادو او ټولګډونه» معیارونو څخه لرې شوې دي، چې وړاندې یې ژمنه شوې وه.
د ۲۰۲۶ کال نړۍوال جام د متحده ایالاتو، مکسیکو او کاناډا په ګډ کوربهتوب ترسره کېږي او ټاکل شوې، چې د جون پر ۱۱مه پیل شي. له دې سره سره، د بښنې نړۍوال سازمان ویلي چې اوسني وضعیت په ځانګړې توګه په متحده ایالاتو کې جدي اندېښنې راپارولې دي.
دغه سازمان په امریکا کې وضعیت د «بشري حقونو بحران» بللی او ویلي یې دي، چې د کډوالو ډلهییز اېستل، له کډوالو سره سخت چلند او پر مدني اعتراضونو لګول شوي محدودیتونه د دې سیالیو پر فضا هم اغېز لرلای شي.
د بښنې نړۍوال سازمان د چارواکو په وینا، په تېر کال کې له امریکا څخه تر ۵۰۰ زره ډېر کسان اېستل شوي او دا لړۍ ښايي د نړۍوال جام پر مهال هم دوام وکړي. دغه بنسټ د فوټبال له نړۍوال فډراسیون (فیفا) څخه غوښتي، څو تضمین واخلي چې د لوبغالو شاوخوا، د مینهوالو په سیمو او د راټولېدو په ځایونو کې د کډوالۍ او ګمرک ادارې ځواکونه شتون ونهلري، ترڅو نندارچیان له وېرې پرته په مراسمو کې ګډون وکړي.
همداراز ټینګار شوی، چې باید د سولهییزو اعتراضونو زمینه برابره شي او د ځینو هېوادونو لکه سنګال، عاج ساحل، هایټي او ایران د وګړو پر ننوتلو لګول شوي محدودیتونه لرې شي. دغه سازمان د جنسیتي تنوع لرونکو کسانو د پلویانو لپاره د حمایوي تدابیرو غوښتنه هم کړې ده.
دا په داسې حال کې ده، چې په مکسیکو کې اندېښنې ډېری د امنیتي فضا پر «نظامي کولو» متمرکزې دي. د دغه هېواد دولت اعلان کړی، چې د سیالیو د امنیت لپاره به د ۲۰ زره سرتېرو په ګډون شاوخوا ۱۰۰ زره امنیتي ځواکونه وګوماري. د بښنې نړۍوال سازمان بیا خبرداری ورکړی، چې دا پراخ نظامي حضور د بشري حقونو د نقض او د اعتراضونو د ځپلو لامل کېدای شي.
په کاناډا کې بیا د بېکوره شویو کسانو د وضعیت په اړه اندېښنې شتون لري. دغه بنسټ خبرداری ورکړی، چې د ونکوور او ټورنټو په څېر ښارونو کې د «ښکلا» لپاره اقدامات ښايي د بېسرپناه کسانو د جبري بېځایه کېدو لامل شي، هغه موضوع چې تر دې وړاندې د ۲۰۱۰ کال د ژمنیو المپیک لوبو پر مهال هم راپور شوې وه.له دې سره، په امریکا او کاناډا کې دولتي چارواکو اعلان کړی چې د نړۍوال جام په خوندي، عادلانه او ټولګډونه ډول ترسره کولو ته ژمن دي.د بښنې نړۍوال سازمان ټینګار کړی، چې موخه یې په دغو سیالیو کې د مینهوالو د ګډون مخنیوی نهدی، بلکې غواړي هغوی د شرایطو او خپلو حقونو په اړه په پوهاوي سره پرېکړه وکړي.
