په پاکستان کې مېشت یو شمېر افغان محصلان چې پياوار کارتونه لري او په بېلابېلو پوهنتونونو کې په زده کړو بوخت دي، شکایت کوي چې پولیس یې نیسي، توقیف کیږي او حتا یو شمېر محصلان بېرته افغانستان ته اېستل کیږي.
په پاکستان کې میشتو یو شمېر افغان محصلانو له افغانستان انټرنشنل-پښتو سره په خبرو کې ویلي چې ډېری یې د پوهنتونونو په شپږم او اتم سمسټر کې دي او د خپلو زده کړو د دوام لپاره یې له سختو مالي ستونزو سره سره د سمسټر فیسونو په نوم سلګونه زره پاکستانۍ روپۍ ورکړې دي، خو د دوی په وینا، اوسني وضعیت د هغوی ټولې تعلیمي هڅې له جدي ګواښ سره مخ کړې دي.
محصلان وایي چې د نیول کېدو وېره دومره زیاته شوې چې د پوهنتونونو حاضري، لابراتوارونه او ازموینې په منظم ډول نه نه شي تعقیبولی.
د دوی په وینا، د قانوني اسنادو او ویزو د تمدید ستونزې هم د افغان محصلینو له مهمو اندېښنو څخه دي.
دوی زیاتوي چې د پياوار کارت لرونکي محصلان د اسنادو د نوي کولو په بهیر کې له اوږدو، پېچلو او ستونزمنو پړاوونو سره مخ دي، چې له امله یې د پولیسو له خوا د نیونې خطر ورځ تر بلې زیاتېږي.
پر امنیتي ستونزو سربېره، یو شمېر محصلان وایي چې د پولیسو د عملیاتو له امله اړ شوي خپل شپه غالي او کرايي کورونه پرېږدي، چې دې چارې د دوی د استوګنې او زده کړو وضعیت لا پسې کړکېچن کړی دی.
د محصلینو په وینا، یو تن محصل، چې د وروستي سمسټر په ازموینو بوخت و، د خیبرپښتونخوا پولیسو ونیوه او له هېواده واېستل شو. دغه راز، یو بل محصل، چې د اووم سمسټر محصل و، هم له ورته برخلیک سره مخ شوی دی.
افغان محصلان د پاکستان له حکومته غواړي چې د دوی د تحصیلي دورې تر بشپړېدو پورې د پاتې کېدو اجازه ورکړي او په دې موده کې دې د پولیسو له عملیاتو څخه مستثنا وګرځول شي.
دوی ټینګار کوي چې له زده کړو وروسته به په عزت خپل هېواد ته ستانه شي.
دوی دا هم ویلي چې خپلې ستونزې یې څو ځله په اسلاماباد کې د طالبانو له سفارت سره شریکې کړې دي، خو تر اوسه یې کومه عملي پایله نه ده ترلاسه کړې.
دا په داسې حال کې ده چې د تورخم دروازه نن یو ځل بیا د کډوالو د ستنېدو لپاره پرانیستل شوې، خو لا هم د عامو خلکو او سوداګرۍ پر مخ تړلې ده. د لارې د بشپړ پرانیستلو لپاره دواړې خواوې یو بل ته شرطونه لري.
