پنجاب کې د یوه دېوال نړېدو له امله دوه ماشومان مړه او پنځه نور ټپیان شوي دي
د پاکستان د پنجاب ایالت په قصور ولسوالۍ کې د تېرې سېشنبې په ورځ تر سختو ورښتونو او تېزو بادونو وروسته د واده تالار یو دېوال نړېدو له امله دوه ماشومان مړه او پنځه نور ټپيان شوي دي. پولیس وايي، یاده پېښه د قصور ولسوالۍ شیخوم کلي ته څېرمه شوې ده.
د ژغورنې ادارې په وینا؛ پېښه هغه مهال رامنځته شوه، کله چې دغه ماشومانو د یاد تالار په ازاده فضا کې لوبې کولې. په يوې بلې جلا پېښه کې بیا د سختو ورښتونو او تېزو بادونو له امله د یوه کور بام ونړېده، چې له امله یې د یوې ښځې په ګډون درې کسان ژوبل شول. پولیس وايي، ټپیان يې سملاسي روغتون ته لېږدولي دي.
