د سولې نوبل جایزې ګټونکې او د زده کړو او نجونو د حقونو فعالې ملالې یوسفزۍ د هاروارډ پوهنتون د خبرو اترو په وروستي پروګرام کې له هېوادونو وغوښتل، چې د افغان ښځو او نجونو د حقوقو ملاتړ وکړي او له طالبانو سره په هر ډول خبرو کې د ښځو پر حقونو جوړجاړی ونه شي.
د ۲۰۲۶ کال د مارچ پر۲۳مه، د هاروارډ پوهنتون د مذاکراتو پروګرام ملاله یوسفزۍ او د ملاله فنډ د ملاتړ او پالیسۍ مدیره ګیسو یاري یوې غونډې ته بللې وې. وروسته ملاله یوسفزۍ او ګیسو یاري د ګډونوالو سره په بحث کې شاملې شوې او د غونډې د برخه والو پوښتنې یې ځواب کړې.
ملالې یوسفزۍ وویل چې د طالبانو په بیا واکمنېدو سره په افغانستان کې د ښځو او نجونو وضعیت ډېر خراب شوی او هغوی له خپلو بنسټیزو حقونو بې برخې شوې دي.
هغې زیاته کړه چې د خبرو اترو په میز کې د ښځو او نجونو حضور باید تضمین شي.
د سولې نوبل جایزې ګټونکې وویل: «کله چې نیمايي نفوس له پرمختګه بې برخې وي، تاسې نه شئ کولی د یوې ټولنې راتلونکې وټاکئ».
هغې څرګنده کړه چې پر ښځو د طالبانو بندیزونه زیاتره وخت د کلتوري او دیني مسایلو په توګه ګڼل کېږي، خو دا په داسې حال کې ده، چې افغانې ښځې د افغان کلتور استازیتوب کوي او همدا ښځې دي، چې له طالبانو سره مبارزه کوي.
د یوسفزۍ په وینا، طالبانو د ۲۰۲۱ کال د دوحې په ناسته کې وویل، چې ښځې به په دې مجلس کې نه وي او د ملګرو ملتونو استازو دغه غوښتنه ومنله.
نوموړې وویل چې د افغان ښځو غږ باید واورېدل شي او له طالبانو سره په خبرو اترو کې پرې جوړجاړی ونه شي.
