محمد بن سلمان او پوتین د سیمهییز کړکېچ او نړیوالو اقتصادي اغېزو په اړه غږېدلي
د سعودي عربستان ولیعهد محمد بن سلمان د روسیې ولسمشر ولادیمیر پوتین سره په یوه ټیلیفوني اړیکه کې خبرې کړي، چې پکې د سیمې د پوځي کړکېچ پر پراخېدو، د سمندري تګ راتګ د امنیت او په نړیوالو اقتصادي اغېزو اندېښنې مطرح شوي.
د سعودي عربستان د بهرنیو چارو وزارت په ایکس خواله رسنۍ کې ویلي، ولیعهد او د روسیې ولسمشر د سیمې د وروستي پوځي کړکېچ په اړه بحث کړي، چې له امله یې د سمندري تګ راتګ امنیت او نړیوال اقتصاد اغېزمن کېدی شي.
دواړو لوریو په خبرو کې د سیمې د کړکېچ د منفي پایلو پر وړاندې د ګډو اقداماتو د اړتیا یادونه کړې او د څو مهمو سیمهییزو او نړیوالو مسایلو په اړه یې خپل نظرونه تبادله کړي.
