نوې ترانزیټي لار؛ طالبان، روسیه او ترکمنستان د نوي ټرانزیټي دهلیز په اړه هوکړې ته نږدې شوي
کازان خبري اژانس راپور ورکړی چې ټاکل شوې د روسیې (د تاتارستان جمهوریت)، ترکمنستان او افغانستان ترمنځ د یوه درېاړخیز ترانزیټي دهلېز د جوړېدو هوکړه به د مې میاشتې په ترڅ کې او د «کازان فورم» په څنډه کې لاسلیک شي.
د راپور له مخې، دا نوې لار د «شمال–جنوب» دهلېز بدیل بلل شوی، ځکه چې په ایران کې د روانو نښتو له امله د یاد دهلېز کارول له ستونزو سره مخ شوي دي.
په افغانستان کې د روسیې د سوداګریز مرکز مشر، رستم حبیبولین، د پنجشنبې په ورځ ویلي چې دا دهلېز کولی شي د روسیې او افغانستان ترمنځ د توکو د لېږد لپاره یوه نوې او اسانه لار برابره کړي. هغه زیاته کړې چې دا مسیر به د اروپا او اسیا هغو شرکتونو ته هم ګټور وي چې د خوندي او باوري ترانسپورتي لارو په لټه کې دي.
راپور زیاتوي چې د طالبانو د صنعت او سوداګرۍ وزیر، نورالدین عزیزی، د دې طرحې له مهمو ملاتړو څخه ګڼل شوی او تمه ده چې لومړني بارونه به له تاتارستان څخه افغانستان ته ولېږدول شي.
همدارنګه ویل شوي چې د تاتارستان د صنعت او سوداګرۍ وزیر، اولګ کوروبچنکو، دا موضوع له نږدې څاري او د عملي کېدو بهیر یې تعقیبوي.
د کازان خبري اژانس په وینا، افغانستان په وروستیو کلونو کې د تاتارستان د حلالو محصولاتو لپاره له مهمو بازارونو څخه ګرځېدلی دی. د راپور له مخې، افغانستان په ۲۰۲۵کال کې د ۵۱.۷میلیونه ډالرو په ارزښت حلال محصولات اخیستي، چې دا د تېر کال په پرتله د پام وړ زیاتوالی ښيي. خو زیاتره دا واردات په غیرمستقیم ډول او د منځنۍ اسیا د هېوادونو له لارې ترسره شوي دي.
