د طالبانو امر بالمعروف وزارت وايي چې روانه اونۍ یې د ښځو د حقونو ۸۴ قضیو ته رسېدنه کړې ده. په داسې حال کې چې په افغانستان کې ښځې لا هم له زده کړو، کار او عامو ټولنیزو فعالیتونو منع دي.
د دغه وزارت له خوا په ایکس تازه خپور شوي راپور کې ویل شوي چې محتسبینو یې په روانه اونۍ کې ۸۴ د ښځو د حقونو قضیو ته رسیدګي کړې، ۱۱ جادوګر یې نیولي، د دښمنیو او شخړو ۶۳ قضیې یې حل کړي او له سوداګرو او صنعتکارانو سره یې ۱۸۹ اصلاحاتي غونډې ترسره کړې دي.
خو د ښځو د حقونو مدافع سازمانونه وایي چې دا شمېرې یوازې د طالبانو د یاد وزارت د فعالیت تبلیغ دی او په عمل کې ښځې لا هم په کورونو پورې محدودې دي، ښوونځیو ته نه ځي، په کار یا سیاسي فعالیت کې برخه نه اخلي او د پارکونو، دفترونو او نورو عامو ځایونو ته لاسرسی نه لري.
