د طالبانو د صنعت او سوداګرۍ وزیر نورالدین عزیزي وايي چې په تېر لمریز کال کې د هېواد په بېلابېلو صنعتي سیمو کې نږدې ۵۰۰ شرکتونو ته څه باندې ۲۵۰۰ جریبه ځمکه وېشل شوې ده. هغه وویل چې ۱۵۰۰ نورو شرکتونو ته هم ځمکې وېشل کیږي.
عزیزي دا څرګندونې د پنجشنبې په ورځ، د وري پر ۱۳مه، په صنعتي سیمو کې د نیالګیو کښېنولو د سراسري کمپاین پر مهال وکړې، چې د طالبانو په وینا، د صنعت او سوداګرۍ وزارت په نوښت او د افغانستان د صنایعو او کانونو خونې په همکارۍ د هېواد د زرغونولو په موخه پیل شوی دی.
عزیزي وویل، چې په صنعتي سیمو کې د بنسټیزو تاسیساتو له جوړېدو سره به نږدې ۱۵۰۰ نورو شرکتونو ته هم ځمکه ووېشل شي.
هغه له هغو صنعتکارانو چې ځمکې ورکړل شوې، وغوښتل چې د خپلو پلانونو له مخې فعالیت پیل کړي او که داسې ونه شي د قانون له مخې به ځمکې بېرته ترې واخیستل شي.
د طالبانو یاد وزیر زیاته کړه چې په کوردننه پانګونه د بهرنیو هېوادونو په پرتله ګټوره ده، ځکه هم پانګوال او هم ولس ترې ګټه اخلي. هغه دا کار د اوسني اقتصادي وضعیت د ښه کېدو لپاره مهم وباله.
عزیزي د چاپېریال ساتنې پر ارزښت هم ټینګار وکړ او ویې ویل چې د نیالګیو کښېنول د اکسیجن د تولید، د هوا د ککړتیا د کمېدو، د وچکالۍ د مخنیوي او د کرنیزو محصولاتو د زیاتېدو لامل ګرځي، چې په پایله کې د صادراتو کچه هم لوړېږي.
عزیزي له ټولو هېوادوالو، په ځانګړي ډول له صنعتکارانو او د کرنې او مالدارۍ سکتور له غړو وغوښتل چې د نیالګیو کښېنولو په کمپاین کې فعاله ونډه واخلي.
په دې غونډه کې د صنعت سکتور ځینو مشرانو هم خبرې وکړې او صنعتکاران یې وهڅول چې د چاپېریال ساتنې او زرغونتیا لپاره عملي ګامونه واخلي.
