د خیبر پښتونخوا د ناورينونو مدیریت ادارې په دغه ایالت کې د ورښتونو له امله د رامنځته شوي ځاني او مالي زیانونو راپور خپور کړی. په راپور کې راغلي، چې د دغه ایالت په بېلابېلو ولسوالیو کې د سختو ورښتونو له امله ۲۵ کسان مړه او ۷۷ نور ټپیان شوي دي.
د یادې ادارې د راپور له مخې؛ په مړو شویو کسانو کې ۱۸ ماشومان، دوه نارینه او پنځه ښځې شاملې دي او د ټپیانو په ډله کې بیا ۳۳ نارینه، ۹ ښځې او ۳۵ ماشومان شامل دي.
یادې ادارې ويلي، چې د دغه ورښتونو له امله د بنو، اېبټاباد ،کوهاټ ،پېښور، نوشهره، باجوړ، لکي مروت، کورمې، هنګو، شانګله، بونېر، ملاکنډ، اپر دېر، بټګرام، شمالي وزیرستان او ټانک ولسوالۍ سختې اغېزمنې شوې دي، چې له کبله یې ۸۸ کورونه زیانمن شوي دي.
له بل پلوه د بلوچستان په بېلابېلو برخو کې هم د سختو ورښتونو له کبله د دوو ماشومانو په ګډون ۷کسان مړه او څلور نور ټپیان شوي دي. د بلوچستان د ناورينونو مدیریت ادارې بیا ويلي، چې له دې ډلې په کیچ او لورلايي کې دوه، دوه، په کوهلو کې یو کس او په جعفر اباد او کچي والسوالیو کې بیا یو، یو ماشوم مړ شوی دی.
