د طالبانو تر واک لاندې د کډوالو ستونزو ته د رسېدنې عالي کمېسیون وایي، چې پرون د چهارشنبې په ورځ ۲۶۹ کورنۍ له ایران او پاکستان نه په جبري توګه افغانستان ته ستنې کړای شوې دي. یاد کمېسیون ویلي، چې په همدې ورځ ۵۴ نورې کورنۍ بیا خپلو سیمو ته لېږدول شوې دي.
د طالبانو دغه کمېسیون د پنجشنبې په ورځ (د وري ۱۳مه) په یوې خبرپاڼه کې ویلي، چې له دې ډلې د نيمروز د ورېښمو پله لارې ۴۶، د ننګرهار د تورخم له لارې ۸۹، د هرات د اسلامکلا له لارې ۳۵ او د کندهار د سپين بولدک له لارې ۹۹ کورنۍ افغانستان ته ستنې شوې دي.
طالبانو ویلي، چې سلګونه ستنو شویو کورنیو ته یې لومړنۍ مرستې هم ورکړې دي.
له بل پلوه د طالبانو د کډوالو او بېرته راستنېدونکو چارو وزارت ویاند عبدالمطلب حقاني خبر ورکړی، چې د ۱۴۰۴کال په لړ کې له ایران او پاکستان نه ۳مېلیونه او ۱۱۴زره کډوال په خپله خوښه او جبري توګه افغانستان ته ستانه شوي دي.
