د طالبانو د ویاند مرستیال حمدالله فطرت وایي، چې د پاکستان پوځ په تېرو دوو ورځو کې د کونړ، پکتیکا او خوست ولایتونو پر بېلابېلو سیمو د هاوان، توپچي او د ډرون بریدونه کړي. هغه ویلي، د دغو بریدونو په پایله کې ۲۵ تنه ملکیان، چې ډېری یې ماشومان دي، ټپیان شوي او دوه تنه وژل شوي دي.
نوموړي په ایکس خواله رسنۍ کې لیکلي، چې یوازې د کونړ ولایت د سرکاڼو او مرورې ولسوالیو پر بېلابېلو سیمو ۱۵۵ د هاوان او لیرې واټن ویشتونکو توپونو مرمۍ لګېدلې دي. د هغه په وینا، په سرکاڼو ولسوالۍ کې د ناواپاس د دوسرکې په سیمه کې هم لسګونه مرمۍ لګېدلي، چې له امله یې اته ماشومان ټپیان شوي او دوه نور وژل شوي دي.
فطرت زیاته کړې، چې د پکتیکا ولایت په شکین ولسوالۍ کې د ډرون برید له امله درې تنه ملکیان ټپیان شوي دي. هغه همداراز ویلي، چې د پنجشنبې په ورځ بیا د کونړ سرکاڼو ولسوالۍ ته ۱۸۵ مرمۍ توغول شوي، چې له امله یې لس تنه ملکیان ټپیان شوي دي.
د نوموړي په خبره، د کونړ د منورې، دانګام، ناړۍ او شلتن ولسوالیو پر بېلابېلو سیمو هم ۱۷۸ د توپونو او هاوانونو مرمۍ لګېدلي، خو هلته د ځاني تلفاتو راپور نه دی ورکړل شوی.
هغه دا هم ویلي، چې د خوست ولایت د ځاځي میدان ولسوالۍ د جنډو غرې په سیمه کې د ډرون په برید کې دوه تنه ملکیان ټپیان شوي دي.
تر اوسه د پاکستان لوري د دغو بریدونو او په کې د مرګ ژوبلو په اړه څه نه دي ویلي.
